Assam Rifles chhuahsan chei dan tur MLA leh khawtlang hruaitute'n an en

Aizawl East-II bialtu MLA B Lalchhanzova, minister of state hoin nimin zing khan Dawrpui Local Council, YMA, MHIP leh MUP hruaitute'n Dawrpui veng huam chhunga Assam Rifles chhuahsan ram chei dan tur an enfiah.

B Lalchhanzova chuan, Bazar Bungkawn aṭanga chhim lama Assam Rifles awmna ṭhin tlâng báwk hmasa ber, sipai damdawi-in awm ṭhin chu a veng neitu hming chawia Dawrpui Square tia hming vuah a duh thu a sawi a, "Heng lai hmun venhim leh chhiat ṭhata mawhphurtu tur chu Dawrpui khawtlang an ni," a ti.

Sorkar leh mipui thawhhona ṭha tak awm chho tura lang chuan Aizawl East-II huam chhunga awm Assam Rifles chhuahsan tâk awm zel dan turah, mipui tel venain rahṭha tak a chhuah ngei a beisei thu sawiin B Lalchhanzova chuan a sawi a, a ṭul ang zela neitu rilru pua sorkar ṭawiawm turin Dawrpui khawtlang hruaitute a chah.

Dawrpui khawtlang hruaitute chuan, sorkarin ruahmanna a siam tawh chu ṭha thawkhat viaua an hriat thu an sawi a; chutih-rualin, rawtna ṭhenkhat sorkar a thlen leh turte pawh an ruahman nghal.

Kawngpui zauh a nih dawn avanga in ṭhiah ngai - Dawrpui Local Council building, YMA building leh MHIP building sak ṭhatna tur hmunte pawh inkawhhmuh nghal bawk.

Ram ennaah hian UDPA director Jacob Lalawmpuia, deputy director Lalthanghliri Pautu leh assistant director Malsawmtluangi te an tel a; MLA leh Dawrpui khawtlang hruaitute chu Assam Rifles chhuahsan ram, Dawrpui huam chhung chei dan tura sorkarin a ruahman dan an hrilhfiah a ni.