KHAWTHLIR

Literacy Day

Assam Rifles chuan September 8, Thawhlehni khan Champhaiah International Literacy Day an hmang a, Agape School aṭangin zirlai 45 leh zirtirtu pathum an tel. Ziak leh chhiar thiam pawimawhnate inzirtira sawiho a ni.

Police-in meth man

Saitual police-te chuan September 8, Thawhlehni zan khan Keifang Kualmawiah Chinzalian (26), Rangoon, Myanmar, tuna Champhai Dinthara cheng leh Thiankhatmuanga (27), Rangoon, Myanmar, tuna Champhai Bethela cheng mek nia insawite hnen aṭangin methamphetamine kg 12.746 an man. Mi pahnihte hi scooter-ah inphurin, Aizawl an pan laiin man an ni.

Zero Tolerance

Kolasib-a divisional forest officer PC Lalṭanpuia chuan September thla hi 'Zero Tolerance Month on Forest and Wildlife Offence' atan a puang. Hemi hun chhunga ramngaw leh nungcha humhalhna dan bawhchhia mante chu dan angin an chungah hmalak a nih dawn thu leh, ngaihhnathiamna a awm dawn loh thu a tarlang.

Ragging sawiho

Serchhip bawrhsap Paul L Khuma hoin nimin khan District Level Anti-Ragging Committee-in zirlaite zinga intihduhdahna hrang hrang - rilru leh taksa intihnatsakna (ragging/bullying) thleng ṭhin chungchangah anti-ragging report mumal taka vawn dan tur te, dan bawhchhiate chunga hremna kalpui dan turte an sawiho. Serchhip district-a sikul tinah anti-ragging committee leh squad din a nih tawh thu tarlan a ni.

Mission AIDS Suraksha sawiho

Khawzawl District AIDS Prevention Control Committee chu nimin khan bawrhsap K Vanlalṭhiana kaihhruaiin DC conference hall-ah an ṭhu. Mission AIDS Suraksha (MAS)-ah Khawzawl district chuan 90-95-95 an tihhlawhtlin thu leh, August 2026 khan Saksham status-ah hlan kai an nih thu tarlan a ni a; 95-95-95 ni thei tura hmalak dan turte an rel a ni.