Larsap leh Deputy Speaker an inkâwm; Aizawl-Vairengte kawng an sawi dun

Governor Gen. Dr Vijay Kumar Singh chu nimin khan Lok Bhavan-ah Assembly deputy speaker Lalfamkima, Kolasib bialtu MLA nen an inkâwm a; Deputy Speaker hian Vairengte leh Sihhmui inkar kawng siam leh Kawnpui - Aizawl inkar kawng zauh chungchangah hmalakpui turin a ngen.

Lalfamkima hian Larsap hnenah hian Vairengte leh Sihmui inkar kawng chhe zual lai, tui pûtin a tihchhiat ṭhinte siamṭhat nan PQC (cement-a chhùn) hmang tura NHIDCL-in 'change of scope' an siam, Delhi lamin a thuphunga an pawm tawh chu sanction thuai a nih theih nan nawrpui turin a ngen a ni. Gen. VK Singh chuan, Delhi-a a kal leh hmasak berah theihtawp chhuaha hma a lak tur thu a lo hrilh.

Kawnpui leh Durtlang kaltlanga Aizawl panna kawng (tlang kawng) pawh thlûr hnih (double lane)-a siam a nih theih nan sorkar laipui hotute hnenah nawrpui turin Lalfamkima chuan Larsap a ngen. Gen. VK Singh chuan, Aizawl luhna leh chhuahna kawng pakhat chauh ring lo a, kawngpui pahnih tal a awm theih a duh thu a sawi a; tlang kawng double lane-a siam chu a ngaih pawimawh thu leh a bawhzui tur thu a sawi bawk.

Deputy Speaker hian kawng siamna tura sanction pawimawhte a rang lama tihfel a, ṭhál inṭan ruala hna ṭan nghal thei tura nawr chhuahsak turin Governor a ngen a ni.