NHM leh Jhpiego ten inremna an ziak

National Health Mission (NHM), Mizoram leh Johns Hopkins University hnuaia Global Health Organisation, Jhpiego te chuan Mizorama hriselna lam hmasawnna turin nimin khan Health minister Lalrinpuii pisaah thawhhona thuthlung Memorandum of Association (MoA) an ziak.

MoS hi primary healthcare, chawṭha pek, nau pai leh nau hrin, nu leh nau te, nausen leh naupang lam kaihhnawih hriselna tihhmasawn leh, natna inkai chhàwn theih leh kai chhàwn theih loh chi hrang hranga thawhhona leh inṭanpui tawnna tur a ni a; NHM aiawhin mission director Dr R Lalchhuanawma leh Jhpiego aiawhin India country director Dr Amit Shah ten thuthlungah hming an ziak a ni.

Health Minister chuan, Mizoram sorkar leh Jhpiego ten thawk dun turin intiamkamna an nei ta trih sawiin, "Thawhhona changtlung zawk kan neih dawn tak avangin MoA hi Mizoram health system tihmasawnna leh tihchangtlung zelna kawngah rahbi thar chhinchhiah tlak a ni. Thawhhona hian hriselna kawnga hmasawn zelna turin Mizoram sorkar a ṭanpui ngei ka beisei," a ti a; Mizoram mipui hrisel nan thawhhona nghet leh chak a pawimawh thu a sawi.

NHM mission director Dr R Lalchhuanawma chuan, MoA hmangin mipui rawngbawlnaah Health department-in nasa taka hma a sawn ngei a beisei thu a sawi a; Dr Amit Shah pawhin MoA thiltumte sawifiahin, thawhhona chuan Mizoram mipui tan rah ṭha a chhuah ngei a duh thu a sawi bawk.

Thuthlung ziahnaah hian Health & Family Welfare additional secretary Lalnunmawii leh Health Services director Dr Lily Chhakchhuak te pawh an tel a ni.