Ruang 2,949 atan nuai 311.45 pe tawh

Mizoram sorkarin khualkhuaa thite ruang phurh man a tumsakna, ‘Assistance for Transportation of Bodies of Deceased Persons within Mizoram’ kaltlangin ruang 2,949 phurhna atan cheng nuai 311.45 pe a ni tawh.

Social Welfare department-in a tarlan danin, September 1, 2024 aṭangin Mizoram sorkarin khualkhuaa thite ruang phurh man a tumsak a; September 2024 aṭanga August 31, 2026 thleng khan ruang 2,949 phurhna atan Rs 3,11,45,568 sorkarin a pe tawh a ni.

Mizoram sorkar chuan ruang phurhna senso tur hi kum 2024-25, 2025-26 leh 2026-27 khan budget-ah cheng nuai 500 ṭheuh a dah. Ruang phurh inkaihhruaina angin, ruang phurh tur chu a thlenna tur km. 20 aia hnai lo a ni tur a ni a, km. 20 piah lamah chuan tu tan pawh hman theih niin, lirthei thlen theih chin a huam.

Ruang phurhna lirthei hman man chu State Transport Authority-in rate a siam anga bituk a ni a; ruang phurhna man sorkarin a peksak hian lirthei pakhat chiah a huam a, lirthei hman (hire) theihah hian lirthei man cheng nuai 17 man aia to a huam lo. Ruang phurhna hlat zawng chhût nan ruang chhuahna aṭanga a dahna hmun inkar hlat zawng lâk tur a ni a; lirthei thlen lohna khua a nih chuan lirthei thlen theih tàwpna thleng a ni.

Mizoram sorkar chuan ruangphurhna senso hi online kaltlanga dil theih turin January 10, 2026 khan online portal 'Ruangphur-GoM' a tlangzarh a; Google Playstore leh App Store aṭanga lak (download) theih a ni.