Hma la ṭha bera puanah lawm

ZPM Ṭhalai chuan thuchhuah siamin, ruihhlo dona scheme - National Action Plan for Drug Demand Reduction (NAPDDR) kalpui ṭha berah Mizoram puan a ni chu Social Welfare, Women & Child Development department, bawrhsap te, kohhrante leh tlawmngai pawlte thawhhona leh inpekna vanga an ngaih thu leh lawmawm an tih thu an tarlang.

ZPM ṭhalaite chuan, NAPDDR nodal department chu Social Welfare, Women & Child Development department a nih thu sawiin, "A bikin hmeichhia leh naupang lama ruihhlo hluar zel do let nan te, ruihhlo ngai chhanchhuah leh enkawl, ruihhlo ṭhat lohzia awareness campaign kalpui kawngah hma an la nasa hle a ni," an ti.

Ruihhlo do chu Mizoram sorkara department pakhat chauh hmalakna hmanga hlawhtlinpui theiha an ngaih loh thu sawiin ZPM Ṭhalai chuan, "Kohhran leh NGO-te nena ṭanrualna rah chhuak niin kan hria, ruihhlo do kawnga mi inpe tak takte thawhrimna zar liau liau niin kan hria," an ti a; Social Welfare minister Lalrinpuii leh a thawhpui te, DC te, kohhran leh pawlte hmalakna an chhuan thu an tarlang.