Minister-in Hunthar lei tlahniam a tlawh

Aizawl North-III bialtu MLA K Sapdanga, minister chuan nimin zing khan a bial chhung Hunthar Venga lei tlahniam a tlawh a; UDPA Director, PWD Chief Engineer leh a thawpuite, Geology & Mining leh AMC hotu te, Hunthar Veng Local Council leh YMA hruaitute'n ṭawiawmin, lei tlahniam ṭhin siam dan tur an sawiho.

K Sapdanga chuan, lei tlahniam ṭhin chu kum tin a chêt ṭhin avang leh Aizawl châk lakna kawngpui pawimawh ber a nih avangin, lei che zel tur ven paha hmasawnna hna thawh theih dan tur enfiah a ṭul thu a sawi.

PWD hotute chuan, lei tlahniam siamṭhatna tura ruahmanna an neihte an sawifiah a; Hunthar LC hotute'n ram neitu lama harsatna awm thei sukiang tura hma an lo lak dan an tarlang.

Hunthar Veng lei tlahniam ṭhin siamṭhatna atan hian cheng vbc 46.7 vel hû project siam a ni a; Minister ho hian project a hlawhtlin theih nan chak taka bawhzui ni se, an ti.

Lei tlakhniamna hmun ṭha taka siam rem a nih theih nan tih tur tam tak a awm dawn a; UDPA, PWD leh AMC ten an mawhphurhna ṭheuh chak takin bawhzui se, tiin thu an dah. Hna thawh tak tak a nih hmain a ram neitu lam chiang zawka lo be turin Hunthar Veng LC ruat an ni.

Project leh ṭul dangte chu technical committee-te'n bawhzui se, remchang hmasaah project mumal tak thlirho leh ni se an ti bawk a; ṭhál lo awm tur chhungin eng emaw chen tal hna thawh theih turin ruahmanna siam phawt an tum a ni.