Minister pahnih hoin Saichalah lo zo

Agriculture department leh Tourism department huaihawtin nimin khan Saichal thlawhhmaah 'Zaupui lozawhpui' hman a ni a, minister of state pahnih F Rodingliana leh Lalnghinglova Hmar ten an hmanpui.

F Rodingliana chuan, sorkarin kut hnathawktute dâwm kân nan theihtawp a chhuah thu sawiin, "An thlai chìn ṭhenkhatte a leisak bakah, lo hâl zawha thlai chìn (shifting cultivation) aia hrisel leh ram tichhe lo zawk ‘permanent farming’ kalpui ṭan a ni. Lote chu khawl hmanga tihchangtlun zel kan tum a, tuihna ṭha tak tak hman ṭangkai a nih theih nan leh nizung chakna hman a nih theih nan hmalak kan tum," a ti.

Tourism minister Lalnghinglova Hmar chuan, Mizote Mizona chhawm nung zel thei khualzinte hîpna tur Tourism depart­ment-in an ngaihtuah chhuah thu sawiin, "Lozawh hi agri-tourism leh horti-tourism nena inkaihhnawih pawimawh a ni a, sorkar thil tum pawimawh tak - department hrang hrang thawhhona tihlawhtlingtu a ni," a ti a; lozawhpui an hman chu Mizoram mipuiin Saichal khua an hmel-hriatna tur a nih thu a sawi.

Lozawhnaah hian Agriculture & Farmers Welfare leh Tourism department hotute an tel a, hlo thlawh hmabak awmte an thlo zo a ni.