KHAWTHLIR

Ni tin tlan theih

Traffic SP C Vanlalvena chuan, Coordination Committee on Traffic Management-in a rêl angin, MizoTaxi app hmangtu taxi-te chu September 14, 2026 aṭangin ni tin an tlân phal a nih thu a tarlang a; taxi hma leh hnungah STA-in a pek MizoTaxi sticker tar ngei turin a hriattir. Taxi dangte chu intlân chhâwk dan pangngaia tlân tur a ni thung.

IAS-ah kai sang

Mizoram Civil Service (MCS) officer paruk - Teresy Vanlalhruaii, Florence Zotluangpuii, Joseph H Lalramsanga, Lalhmunsanga Hnamte, R Lalchhanhima leh Irene Zohlimpuii Chongthu te chu Indian Administrative Service (IAS)-ah hlan kai an ni. September 10, 2026-a hriattirna chhuaha a lan danin, officer parukte hi AGMUT Cadre an ni dawn a, an batch (kum) erawh tarlan a ni lo.

Lirthei 24 man

Lawngtlai district-a No Tolerance Month hman mekah September 10, Ningani thleng khan lirthei dan bawhchhia 24 man a ni tawh a, pawisa chawitir tling khawm chu Rs 67,500 a ni. No Tolerance Month hman mek kengkawh tura duty-te chu Lawngtlai bawrhsap Donny Lalruatsanga, District Road Safety Committee chairman ni bawk chuan September 10 khan a tlawh a ni.

CADS ruihhlo man

Central YMA hnuaia ruihhlo dotu, Central Anti Drug Squad chuan September 6-11, 2026 chhung khan heroin (no. 4) gram gram 82.564 an man a, Pregabalin tlêp thum, Tumi Spas tlêp 160 leh ganja gram 100 an man bawk. Ruihhlo kaihhnawihah hian mi 24 an khâwm a, chung zinga mi pahnih chu home-ah dahin, mi 16 chu counselling kaltir an ni.

Leivûng paih khap

Champhai district magistrate Mohammad Aaquib chuan thupek chhuahin, Chhangphut Field leh a chhehvelah leivûng paih khap a nih thu a puang. Champhai SP, SDO (Sadar), DUDO leh Champhaia village council-te chu thupek kengkawh tur leh dan bawhchhia an awm chuan rang taka hriattir turin a chah a ni.