Naupang inkhawmpui hlim taka neih a ni

Mizoram Presbyterian Kohhrana pastor bial hrang hrangte chuan nimin Pathianni hmang khan naupang inkhawmpui an hmang a; UPC (North East India) kohhran pastor bialte pawhin September 11, Zirtawpni zan aṭanga nimin thleng khan naupang inkhawmpui an hmang bawk.

Presbyterian Kohhrana pastor bial tam ber chuan nimin khan naupang inkhawmpui an hmang a, bial ṭhenkhatah chuan Inrinni zan aṭangin an hmang. Naupang inkhawmpuiah hian Beginner, Primary, Junior leh Intermediate leh Sacrament department inkawpte an tel.

Inkhawmpuiah hian Pathian thu, hla leh thu inchháng hmangin kohhrante an intihsiak a, pastor bial eng emaw zatah erawh chuan intihsiak angin a kal lo. Naupang zawng zawngte Pathian thu leh hla hmanga an intihsiak bakah hian, naupang thlan bikte'n fakna hla sain, Pathian thu an sawi bawk.

Mizo Sunday School Union hnuaiah kumin 2026 hian sunday school 1,050 a awm a, zirlai 4,33,821 leh zirtirtu 56,862 bakah, rawngbawltu dang 4,467 an awm. Naupang inkhawmpui hi kum 1931 khan Aizawl Tlangnuamah neih hmasak ber a ni a; tunah hian Presbyterian Kohhranah chuan September thla Pathianni vawi hnihnaah hman a ni ṭhin. September 20, Pathianni lehah Senior depart-ment-te'n inkhawmpui an nei ve leh ang.

UPC (NEI)-a pastor bial hrang hrangte chuan September 11, Zirtawpni zan aṭanga nimin thleng khan sunday school inkhawmpui an hmang a; Inrinni khan Bial Sunday School rorel inkhawm neih a ni.

Inkhawmpuiah hian pastor bial ṭhenkhatah chuan naupangte Pathian thu leh hla hmangin an intihsiak a, puitling lam pawhin zirlaibu hmangin quiz leh lengkhawm zai hmangin an intihsiak. Intihsiakna nei loa intawhkhawmna anga hmang bial eng emaw zat an awm bawk.