KHAWTHLIR

Thisen pe

September 12, Inrinni khan KṬP, Aizawl Kohhran Branch chuan Synod Hospital tan thisen unit 33 an pe a, petute mipa 25 leh hmeichhia pariat an ni. PYD (NEI), Ṭawipui North Section pawhin Lunglei Civil Hospital tan thisen unit 42 an pe a, petute mipa 34 leh hmeichhia pariat an ni.

Sangha no sem

Fisheries department leh ICAR – Center for Inland Freshwater Aquaculture (CIFA), Bhubaneswar, Odisha te chuan sangha khawitute hmasawnna tur leh eizawnna tichangtlung turin September 12, Inrinni khan Khawzawl District Fisheries Development Officer pisaah sangha no an sem. Sangha khawitu mi 100 hnenah sangha no (Amur carp) an sem a ni.

Project Genesis

Siaha bawrhsap VL Hruaizela Khiangte chuan September 11, 2026 khan Women & Child Development buatsaih 'Project Genesis' a tlangzarh. Project Genesis hi Siaha district-a khaw 11-ah kalpui a ni ang. Bawrhsap chuan, nu leh naute hriselna chu ram changkang tehfung pawimawh a nih thu a sawi.

Mamit district tlawh

Ministry of Textiles joint secretary leh Central Prabhari Officer for Mamit Aspirational District Padmini Singla chuan September 11, 2026 khan Mamit a tlawh a, Aspirational District programme leh Aspirational Block programme hnuaia hnathawh leh hmalakna thlir letna Mamit DC Conference Hall-ah a hmanpui. Padmini Singla hian Mamit Primary School -V, Vikas Bhawan sak mek, Mamit District Hospital leh Anganwandi Centre-IX te a tlawh bawk.

Morphine an man

September 12, Inrinni tlai khan Saitual police-te chuan Manipur aṭanga Aizawl pana tlan Bolero MZ-01 T-7877 aṭangin morphine kg 5.025 an man a, cheng vbc 5.02 hùa chhût a ni. Lirthei khalhtu leh ruihhlo neitua puh Lamminṭhuama Gangte (42) s/o Pautipkama, Ṭhuampui Kumtluang Veng, Aizawl an man nghal bawk.