MizoTaxi-ah lirthei 1,570 ziak lut tawh; MizoTaxi-a lutte ni tin an tlân thei dawn

MizoTaxi application-ah lirthei 1,570 ziah luh a ni tawh a, app kaltlanga lirthei hman tum 28,553 chhinchhiah a nih tawh. MizoTaxi-a inziak lutte chuan December 14, 2026 thleng tlan loh ní an nei ve dawn lo.

Coordination Committee on Traffic Management chu September 11, 2026 khan an ṭhukhawm a, chief secretary Khilli Ram Meena-a'n kaihruaiin, MizoTaxi app tlangzarh a nih hnua lirthei inziah luh dan leh app hmangtu awm dante thlir let a ni.

Transport secretary C Lalruaia tarlan danin, September 11, 2026 thleng khan MizoTaxi-ah lirthei 1,570 ziah luh a ni tawh a; chungte chu two wheeler taxi 1,149, 397 four wheeler taxi leh auto-rickshaw 24 a ni. MizoTaxi app kaltlanga lirthei hman tum 28,553 chhinchhiah a ni tawh.

Ṭhutkhawmah hian MizoTaxi app-ah State Transport Authority-in rate a bithliah dik tak hman a nih theih dan tur te, taxi hmangtu passenger-te him zawk nana hmanraw ṭangkai a nih theih thu leh, Aizawla taxi parking area tâwt lutuk tihziaawm nana hmanrua a nih theih dante sawi a ni.

Inziah luh hun pawhseina hmasa kalpui chhungin taxi inziak lut an tam thu tarlan a ni a; mipui pawhin application hi an hmelhriat ṭan bakah, an hmang thiam ṭan mek tih sawi a ni bawk.

Coordination Committee on Traffic Management-in a rêl angin Aizawl Traffic SP chuan September 11, 2026 khan hriattirna a tichhuak a; MizoTaxi-a inziak lutte chu vawiin September 14 aṭanga December 14, 2026 thleng ni tin an tlân (service) phal a nih thu a tarlang.

Traffic SP chuan, MizoTaxi-a inziak lutte chu taxi hma leh hnungah STA-in a pek MizoTaxi sticker târ ngei turin a hriattir a; MizoTaxi-a inziak lut lo taxi dangte erawh chu an intlân chhâwk dan pangngaia tlan tur a nih thu a tarlang bawk.