Salem Veng Branch YMA-in mei bung leh plastic úm an lei

Salem Veng Branch YMA, Aizawl chuan an veng a fai lehzual theih nan September 12, Inrinni khan an vengah ṭawih thei lo plastic úm (bottle) leh meizial zûk bung an lei ṭan.

Salem Veng YMA hian plastic úm leh meizial zûk bung an lei hi an tih vawi khatna a ni a; Inrinni khan zing aṭanga lei ṭanin, plastic úm kg 28 leh meizial bung 4,300 an lei a ni. Thla tin Inrinni vawi hnihna leh vawi lina apiangin lei an tum.

Meizial bung leh plastic ûm, hman hnu, paih mai tawh tur an lei chhan chu, an veng khawlai tihnawk thei tur a awm loh nan leh environment humhalhna atan a nih thu Salem Veng YMA hruaitute chuan an sawi.