Lok Adalat-ah thubuai chinfel a ni

India ram hmun dang rualin September 12, Inrinni khan Mizoram hmun hrang hrangah National Lok Adalat buatsaih a ni a; hriat theih chinah Lok Adalat-ah hian thubuai eng emaw zat chinfel niin, Rs 53,60,755 hu leh bank loan bá cheng nuai 113 hmuh lêt a ni.

Siahaa Lok Adalat-ah chuan bench pahnih siam a ni a, thubuai chi hrang hrang ngaihtuaha chinfel niin, bank loan bá ṭhìnna aṭangin Rs 1,13,55,700 hmuh lêt a ni.

Siahaah hian Bench 1-ah District Legal Services Authority secretary leh presiding judge Laltlansangi hoin conciliator pahnih - J Lalnunsangi, advocate leh Jeffrey J Khara, journalist & social worker an ṭhu a; Bench 2-ah presiding judge Sheila Laldinthari Hnialum hoin conciliator pahnih - FC Christina, advocate leh K Pari te an ṭhu.

Serchhipah chuan District Legal Services Authority buatsaihin District Court-ah Lok Adalat buatsaih a ni a; presiding officer Josangzeli Tlau kaihhruaiin conciliator pahnih - K Laldinpuii leh Lalrinhlua ten thubuai 66 - pawisa ba, in hmun inchuh, ramri buai leh bank loan rûl ṭha lo leh thil dangte an ngaihtuah. Thubuai 66 zinga 39 chinfel a ni a, thubuai chinfel hlut zawng chu Rs 53,60,755 a ni.