MIMA leh Income Tax lehkha hmuh avanga buaina tawkte an inkawm

September 11, Zirtawpni khan Mizoram Merchant Association (MIMA) pisaah Income Tax department aṭanga lehkha hmuh avanga buaina tawkte leh MIMA hruaitute an inkawm.

MIMA chuan North East Region-a Income Tax hotupa ber Principal Chief Commissioner of Income Tax, Guwahati leh Chief Commissioner-te harsatna thleng chungchang an sawipui bakah lehkhate pein, Mizorama Income Tax office-ahte lengin an sawipui bawk thu an sawi.

Income Tax aṭanga lehkha hmute Silchar a thawn ngai loa, lo chinfel saktu tur qualified officer pakhat pe tura Income Tax hotute an dil thu sawiin MIMA hruaitute chuan, "Tunah hian Income Tax hotute aṭangin hma min lak sakna lehkha kan dawng tawh," an ti.

MIMA chuan Income Tax dept aṭanga lehkha hmute chu documents ngaite nen chhang zel turin an hrilh. MIMA jt secretary Lalrammuana'n a chhan dan tur atana hriattur ṭulte kalkhawmte a zirtir nghal. Hetianga an chhan hnu pawha assessment year inang renga lehkha an la hmu zel a nih chuan, MIMA-ah report ni se, tih a ni.

Kalkhawmte chuan Mizote tribal an ni reng chunga Income Tax dept-in lehkha a pek reng chungchangah sorkar nen ṭanghoa MIMA, all NGO, all Political party-te inhmuhkhawmin, lehkhate siama hmalak dan ngaih­tuah an rel bawk.