ZPM-in hruaitu thar kan nei dawn, Leader hruaitu a nih theih loh a fel lo - K Sapdanga

ZPM party chuan nimin khan Aizawla an pisaah chhungin inkhawm an hmang a; thusawitu Home minister K Sapdanga chuan, an party-in hruaitu thar an neih dawn thu sawiin, "Leader ber hruaitu a nih theih loh hi a fel lo," a ti.

K Sapdanga chuan, ZPM chu hruaitu thlang thar turin an inbuatsaih tih sawiin, "Kan uluk bawk a, kan ṭhukhawm zing. Party leh sorkar tana ṭha ber tura rin kan thawh khawm. Kan rel chhuak ṭha viau nghe nghe. Kan danglamna pakhat chu leader ka nei hi a ni," a ti a, leader ber party hruaitu nih theih loh chu a fel loh thu a sawi.

Chief Minister chu an ZPM president atan an ruat ta tihna a nih loh thu sawiin Sapdanga chuan, "Elected office bearer thlan theih zingah a tel ve thei tihna a ni. Party elected OB chu Val Upa Council ruat turin dah a ni tawh. Executive thutlukna Leader-in a pawm kha tihmâkmawh a ni. CM leh president kawp a ṭhatna leh ṭhat lohna a awm a, kawp loh kan enchhin tawh a, kawp kan enchhin leh ang," a ti.

K Sapdanga chuan, an party chu kohhran leh mipuiin an la ṭan nia a lan thu sawiin, "Ṭhahnemngai taka ṭawngṭaisaktu kan la nei tam a, malsawmna kan dawn hi kan hâk lek lek ṭhin. Ram chu Lalpa ta a ni a, Pathian hi teltirtu leh bântirtu a ni. Rorelna hi hnai takah min en a, a lam kan hawi chhung chuan min bàntir lo ang," a ti a; Pathian an hawisan chuan Pathianin a hawisan ve nghal tur thu a sawi.

Tuna sorkar ding lai chu November 8, 2023-a inthlana thlan tlin an nih thu sawiin Sapdanga chuan, "November 2028 vel tho hi inthlan leh hun a nih hmel. Kum hnih leh thla khat vel inbuatsaihna hun kan la nei a, kan activity zawng zawng inthlan hawitir a ngai," a ti.

Home Minister chuan, ZPM sorkarah lui hnár a fîm thu sawiin, "Sorkar luipui mawng lam a la fîm danah a hnâr a fim a ni ang. Eptute sawi ang hian a hnár hi nú se, lui dung tluan a nú ang," a ti a; Chief Minister chu eptu a nih lai pawha CM atana duhtu ngah ber a nih thu a sawi.

ZPM thuchhuah tarlan danin, K Sapdanga hian Lawmawma, DEO (rtd) leh Ṭhuamliana, SDEO (rtd) Serchhip ve vete chu an party-ah a lawmlut a ni.