Zorama'n dâwt lian ber sawiah CM a puh; 'ZPM-in party inthlan an huphurh' - Zorama

MNF president Zoramthanga chuan, inremna thuthlung ziah chungchanga dâwt lian ber sawiah chief minister Lalduhoma a puh a; ZPM-in party inthlan an huphurh hle niin a sawi bawk.

Nimina Mizo Hnam Rûna chhung inkhawmah MNF President chuan, "ZPM-in an party inthlan an huphurh hle a, inthlanna neih an tum lo. Vice president pawh eng emaw zat an ruat belh tawh," a ti a; Congress pawh an inthlang dawn loa , vice president an inruat belh zel thu a sawi.

Zoramthanga chuan, MNF party pawh nakkum 2027 khi an inthlan hun a nih thu sawiin, "Inthlang ta ila, elected OB thar, NCC, PAC, adviser, GS, secretary leh frontal zawng zawng a vaia inruat thar a ngai dawn. Promotion beisei nei mi tam tak kan tikhaihlak thei bawk," a ti.

Term dangah pawh party inthlan chu MLA election dawn aruaiah an nei ngai lo tih sawiin Zoramthanga chuan, "MLA inthlan zawh hunah kan nei zawk dawn. Party dang pawhin an ti vek," a ti a; MNF Constitution-in president chu thuneihna a pek angin an party chak lehzuala a kal nan an inruat thar thu a sawi.

MNF President chuan, June 30, 1986-a inremna chu a chhuanawm thu a sawi a, "Mizoram mipui tan chhinchhiah tlak leh pawimawh ber a ni a, India ram hruaitute leh khawvel ram dang hruaitute pawhin ropui an tiin min ngaihhlutsak hle," a ti.

Inremna chu anmahni beitute'n tun hma aṭangin sawi nêp an tum ṭhin nia sawiin Zorama chuan, "Mipuiin an awih duh lo a, an sim hman viau," a ti a; tun hnaiah CM Lalduhoma'n MNF tihchhiat theihna kawng awm chhun nia a hriat vangin a phawrh leh thu a sawi.

Zoramthanga chuan, Lalduhoma'n dâwt a zawnga dâwt lian ber a sawi nia sawiin, "Khatianga a sawi avang khan beitu a ngah ṭan viau a, a zûzî nan thil chi hrang hrangin a sawi kual hnan leh. Pu Duhoma hian 'inremna tlar tinah ka tel ve a ni' a tih kha, a tel lohna zawng zawngah pawh lan ropui duhin tel angin a insawi vek a ni," a ti.