Khawsak harsate khai chhuahna atana hman tur C-LAP Minister-in a tlangzarh

Urban Development & Poverty Alleviation (UDPA) minister K Sapdanga chuan nimin khan a pisaah City Livelihood Action Plan (C-LAP) a tlangzarh. Aizawlah mi 4,06,228 an cheng anga chhût a ni a, chung zinga 72% vel chu hna thawk thei rual, kum 15-59 inkar an nih thu tarlan a ni.

C-LAP hi UDPA department leh Pachhunga University College-a Economics department ten thawhhona thuthlung an ziah anga buatsaih a ni a; a tum ber chu - khawpuia eizawnna leh ni tin khawsaka harsatna awm ṭhin hmachhawn dan tur fel taka ruahman a ni.

UDPA Minister chuan, khawpui hmasawnna tur hrang hrang ngaihtuaha hmalak a nih rualin, khawsak harsa zawk, dinhmunin a zir loh vanga innghahna tlak eizawnna mumal nei lote hmakhua ngaihtuah a ngaih pawimawh thu a sawi a, "UDPA department hminga chuang sa leh a hnathawh ber a ni," a ti.

K Sapdanga chuan, C-LAP ah data ṭangkai tak tak tur a chuan thu sawiin, "Department tan pawh documentation ṭha neih belh phahna zel a ni," a ti. Khawsak harsate khaichhuah hna thawhna atana ṭangkai tur C-LAP buatsaih a ni chu lawmawm a tih thu sawiin, a buatsaihtu PUC Economics department research team-te fakawm a tih thu a sawi.

UDPA director Jacob Lalawmpuia chuan, C-LAP chu Ministry of Housing and Urban Affairs-in buatsaih tura a ruahman anga buatsaih a nih thu a sawi a, "PUC Economics department nen MoU ziaka hma kan la thei hi a lawmawm. Department hmalakna atan chauh ni lo, zirlai research ti duhte tan data pawimawh tak a ni," a ti.

Tarlan danin, C-LAP atan hian March 20, 2025 khan ṭhutkhawm hmasa ber neih a ni a, September 4, 2026 khan final report thehluh a ni. Zirchiannaah hian chhiarpui 2001 aṭanga 2011 data-a mihring pun dan hisâpin kum 2024 khan Aizawlah mi 4,06,228 awm anga chhût a ni.

Mi 4,06,228 zinga 72% vel chu hna thawk thei rual, kum 15-59 inkar an ni a, hna thawk thei, thawk mek leh thawh tur zawng mek belhkhawm chu 50.60% a ni. Hnathawh mumal tak nei 47.96% an awm anga chhût a ni a, hna thawk thei lo - naupang, upa, zirlai, ramtuileilo leh thawh tur zawng lo hrim hrim 49.40% an awm anga chhût a ni bawk.

PLFS 2024 data hmanga chhûtin Aizawla hnathawh nei mek zinga 47% (mi 60,544) chu mahni hna thawk (self employed) an ni a; mi hnuaia inhlawhfa (casual labour) 44% (mi 56,928), sorkar hnathawk leh regular taka hlawh laa thawk 9% (mi 12,080) an awm. Sorkar emaw, private company changtlung tak emaw ni loa hnathawk an tam zawk.

Retheihna vanga sorkarin a dâwm kân mek zingah, AAY chhungkua 3,729 awmin, PHH chhungkua 36,129 an awm a; AAY leh PHH card hmanga ration buhfai la mi 1,00,000 chuang an awm.

Hna kânglâng leh nghet lo thawk (informal worker) sorkarin a chhinchhiahna portal, E-Shram portal ah mi eng emaw zat an inziak lut tawh a; a tam ber chu in sak leh cement hna khawihtute niin, mi 2,500 vel an ni.