CM Special Package thawh 2-na sem

Nimin khan Aizawl, Kolasib, Serchhip leh Lawngtlai district-ah Bána Kaih (Handholding) hnuaia Chief Minister's Special Package thawh hnihna (Phase-II) dawng tura thlan mi 1,180 hnenah ṭanpuina sum sem a ni a; cheng nuai 590 sem chhuah a ni.

Aizawlah chuan Vanapa Hall-ah CM's Special Package sem niin, department 12 hnuaia progress partner tura thlan mi 683 hnenah Rs 50,000 ṭheuh pek a ni a; Agriculture minister PC Vanlalruata'n a hmanpui.

PC Vanlalruata chuan, sorkarin kut hnatawhtute tana policy a duante tihhlawhtlin a nih mek thu sawiin, "Politician-te'n ram kaihhruai kan tum dan policy kan duang a, mipuiah kan zuar ṭhin. Mizoram mipui chuan kan Chief Minister-in kut hnathawktute'n an thawhrimna rah an seng theih nan leh hmasawnna rahbi an tuk theih nan Mizoram dung leh vanga kum tam a lo aupui tawh chu tihhlawhtlinin a awm mek," a ti.

CM Lalduhoma kaihhruai sorkarah mipui an lawm nia sawiin Minister chuan, "Kut hnathawktute an lawm hle. Thlai thar market kan inzawnpui bakah, support price hmanga kan inum zel avangin kut hnathawktute thlan tui a lothlâwnin a far tawh lo," a ti a; Bána Kaih hnuaia progress partner-te chu uluk taka thlan an nih thu a sawi.

PC Vanlalruata chuan, progress partner-te hmalak dan monitoring team-in an endik dawn tih sawiin, pawisa rulh ngai an nih loh nan an thutiamah nghet taka ding turin a chah a ni.

Kolasib-ah chuan IPR conference hall-ah CM Special Package sem a ni a; khuallian Assembly deputy speaker Lalfamkima chuan, "ZPM sorkar inrelbawl tirh kum khatnaah sum renchemna (austerity measure) khauh taka kalpui a ni. Tunah chuan sorkar hian kum hnih pawh la tling lo chhungin hma a sawn chho chak hle a, sorkar chuan kut hnathawktute a ngai pawimawh hle a ni," a ti.

Lalfamkima chuan, "Kolasib rama ṭha thei tur thlai - hmunphiah, anchiri leh thlai dang tam tak chîn theih dan sorkarin a ngaihtuah mek," a ti a; sorkar a rinawm angin mipui leh kut hnathawktute pawh an rinawm a, taima taka hna an thawh a pawimawh thu a sawi. Kolasib-ah hian mi 176 hnenah CM Special Package Rs 50,000 ṭheuh pek a ni.

Serchhip district bawrhsap Paul L Khuma chuan DC Pisapui Hall-ah mi 176-te hnenah CM Special Package Rs 50,000 ṭheuh a sem. DC chuan, progress partner-te chu sorkarin ram economy innghahna la ni thei tura beiseina leh rinna nena thlir an nih thu sawiin, rinawm taka thawk ṭheuh turin a fuih.

Lawngtlaiah chuan DC Donny Lalruatsanga'n mi 145 hnenah CM Special Package ṭanpuina Rs 50,000 ṭheuh a sem. Bawrhsap chuan, kut hnathawktute'n leirem an rah theih nan sorkarin theihtawp a chhuah thu sawiin, "A hlawhtlinna hi progress partner-te kutah a innghat thui em em a ni," a ti.

CM Special Package ṭanpuina sum hi instalment-a pe loin, a vaiin vawi khatah pek a ni a, direct benefit transfer hmangin a dawngtute bank account-ah thun vek tur a ni. Department tinin an hnuaia progress partner-te chu training an neihpui tawh.