KHAWTHLIR

MTC-in thisen pe

Missionary Training College (MTC) chuan nimin khan thisen pek an huaihawt a, mipa 23 leh hmeichhia 12 ten Synod Hospital tan thisen unit 35 an pe. MTC hi Mizoram Synod hnuaia missionary-te inzirna hmun a ni.

CM-in râl

Chief minister Lalduhoma chuan mi kuttuara thi H Lalramdinpuii (15), Mualṭhuam North chhungte hnenah nimin khan râlna a hlan. Râlna hlan turin CM chuan OSD to CM R Lalrodingi chu Mualṭhuam North-ah a tir a, OSD hian H Lalramdinpuii pa H Lalawmpuia hnenah râlna a hlan a ni. H Lalawmpuia chuan, vanduaina an tawhah CM-in a ngaihsak avanga a lawm thu a sawi.

Lei zawh khap

Hnahthial bawrhsap K Vanlalruati chuan thuchhuah siamin, Tuipui South khua Chhimtuipui lui chunga lei, suspension bridge-ah zan dar 10 aṭanga zing dar 5 inkarah lirthei kal khap a nih thu a tarlang. Khapna thupek chu lei zawh thei tura lirthei rit phurh theih chin bituk aia rit phurte;n zan reiah an zawh ṭhin vang a nih thu leh, khapna hian emergency leh medical vehicle-te a huam loh thu a tarlang bawk.

Police-in meth man

Champhai police-te chuan September 14, Thawhṭanni khan Chhungte bulah maxicab MZ-04-4048 aṭangin methamphetamine mûm 20,200 (kg 2.160) an man. Lirthei khalhtu Laltlanhlua (27), Murlen, tuna Champhai Dinthara cheng mek nia inchhal leh a thurualpui J Thangsiansanga (42), North Diltlang te pawh man nghalin, thubuai an siamsak.

PMAY-U dilna endik

Serchhip bawrhsap Paul L Khuma hoin nimin khan Committee on PMAY 2.0 (Urban) an ṭhu a; in sak ṭanpui dilna 230 an thlirhona aṭangin dilna felfai 40 chu ṭanpuina dawng thei huangah an dah. PMAY 2.0 (Urban) Phase-II atan hian Serchhip khawpui huam chhungah ṭanpuina dawng thei quota/allotment 125 a awm a ni.