Sorkar programme-ahte tui ûm chhawp lo turin inhriattir nawn

General Administration depatrment (GAD) chuan September 14, Thawhṭanni khan office memorandum a tichhuak a; May 5, 2029-a sorkar hun hman hrang hranga tui ûm (packaged drinking water) chhawp lo tura hriattirna chhuah tawh chu sorkar department leh office hotute a hriattir nawn.

GAD chuan, sorkar programme hrang hranga water dispensar, jug (glass) leh no (glass) chhawp ṭhin tur a ni thu a tarlang a, "Tui plastic bottle-a chhawp a nih hian, in zawh a nih loh phei chuan tui leh sum tam tak a rîral phah ṭhin. Water dispenser leh tui semna tlo zawk leh ṭha zawk hman tumna a tiṭhuanawp a ni," a ti.

Plastic tui ûm vawi khat hman (single-use) hman nasa lutukin leilung leh boruak tan nghawng ṭha lo a thlen tih tarlangin GAD chuan, plastic chu ṭawih thei lo a nih avangin, plastic tui ûm hman tlem chu boruak humhalh nan mai ni loin, sum leh pai rîral tihtlem nan a pawimawh thu a tarlang.

Mizoram sorkara administrative head, head of department leh head of office zawng zawng chu sorkar policy ding lai chu khauh taka zâwm tur leh, inkhawm, conference, seminar, workshop, function leh sorkar programme zawng zawngah plastic ûma tui sem chu theihtawp chhuaha do tur leh titawp turin hriattir an ni.

Official function buatsaihtute chu plastic ûm hmang lo a, tui in tur thianghlim leh awlsam taka hmuh theihna tur ruahman tura ngen an ni a; mipui pawh plastic bawlhhlawh siam tlem zawk theihna tura sorkar thawhpui turin ngen leh beisei an ni bawk.