Tribal Artisan Empanelment Mela

Nimin khan Commerce & Industries conference hall-ah PM Vishwakarma Tribal Artisan Empanelment Mela buatsaih a ni a, kut themthiam (artisan) 28 telin, Commerce, Industries, Geology & Mining secretary Dr H Lianzela’n a hawng.

Mela hi Commerce, Industries, Geology & Mining department, Tribal Cooperative Marketing Development Federation of India Limited (TRIFED), DFO Branch MSME Aizawl leh State Monitoring Unit, PM Vishwakarma te buatsaih a ni a; a tum ber chu - TRIFED leh PM Vishwakarma hnuaia Mizorama kut themthiamte leh kutkawih eizawnna titute (entrepreneur) insumdawn tawn theihna tura kawng hawn a ni.

PM Vishwakarma Tribal Artisan Empanelment Mela-a tel mi 28-te chu TRIFED aiawhte nen an inkâwm a; an thil siamte TRIFED outlet-a zawrh theih tur chi a nih chuan TRIFED hnuaiah inziak lutin, an pho chhuak ve thei dawn a ni.

Dr H Lianzela chuan, Mela-a telte chu an kutchhuakte belhchian dâwl leh lei nawn châkawm a nih theih nan ṭha taka siam turin a chah a; tuna an siam chhuah aia tam an siam theih nan hma la tur leh, zau zawka hralh thei tur khawpa ṭang lehzual turin a fuih.

TRIFED hian India ramah ‘Tribes India’ tih hmingpuin hmun 110 velah thil zawrhna (outlet) an nei a; an hnuaia inziak lutte aṭangin bungraw zawrh turte an lei khawm ṭhin a ni.