Bawrhsap hoin Champhai district chhunga zirna-in 20-ah anti-drug club din an rêl

Champhai District Nasha Mukt Bharat Abhiyaan (NMBA) committee chu district bawrhsap Mohammad Aaquib kaihhruaiin nimin khan an ṭhukhawm a; sikul leh college 20-ah anti-drug club din an rêl.

Bawrhsap chuan, ruihhlo donaah sorkar leh tlawmngai pawlte'n ṭangruala beihpui an thlak zel a ṭul thu a sawi a, "Zirlai leh ṭhalai zawng zawng ruihhlo laka an fihlim theih nana zirtirna neih hi thil ṭul ber pakhat a ni a, meizial leh e-cigarette (vape) zûk chungchang pawh ngaih pawimawh a ṭul," a ti a; ṭhalaite himna atan theihtawp chhuah turin kal khawmte a chah.

Ṭhutkhawmah hian sorkar kum 2026-27 chhunga ruihhlo laka ṭhalai, sikul leh college zirlaite an him theihna tura hmalakna turte sawiho a ni a, sikul leh college-ah anti-drug club 20 din an rêl. Anti-drug club-te kaltlangin rally, essay writing leh poster siam hmangtein zirlaite pual campaign uar taka buatsaih ṭhin an rel bawk.

Meetinga an ruahman dan chuan, Police, Health department, khawtlang hruaitute leh tlawmngai pawlte'n ṭangrualin ruihhlo hluarna hmunte ngawrh zawkin an vil dawn. Sikul leh college chhehvel metre 100 huam chhungah meizial leh ruihhlo hrim hrim tih leh zawrh khap tura enforcement team-te nen man leh vil hna thawh chhunzawm a ni ang.