Mizo hming hawha dawrkai hnam dang an tam hle - MIMA

Mizoram Merchant Association (MIMA) chuan thuchhuah siamin, tun dinhmunah Mizoramah Mizo hming hawha dawrkai leh dan loa hnam dang thurualpuia sumdawng an tam thu an tarlang.

MIMA chuan, Sairangah rêl a lo lut a, chhim tàwp thlengin a lut zel dawn tih tarlangin, "Kawngpui lianpui puiin kan ram tluanin a la tlawh ang a, airport thlengin a awm belh zel ang. Mizote hi hnam anga kan ṭanrual a, ngaimawh tur kan ngaimawh a ṭul tak zet tawh," an ti.

Eizawnnaa inchîmralna kawngah hmabak a ko lo hle nia sawiin MIMA chuan, "Kan state ṭhenawmah indegenous person, Tripura-ah Tiperi leh Assam-ah Cachari te chîmralin an awm tawh," an ti a, Shillong-ah pawh Khasi dawrkai lian hmuh tur an awm tawh loh thu an sawi.

Mizoramah a ram mite chunga economic assimilation a thlen loh nan eng pawl pawhin he lam kawngah hian hma la se, pawl ang te, kohhran ang leh mimal ang pawhin ṭangrual tlat turin MIMA chuan an ngen a; Mizo hming hawha hnam dang sumdawntir tihtawp a nih theih nan theihtawp chhuah ṭheuh turin mipui an sawm a ni.