Anthurium Festival neih tur sawiho; 'Mizoramah tourism a ṭhang nasa' - Tourism Minister

Tourism minister Lalnghinglova Hmar hoin nimin khan a pisaah kumina Reiek leh Ailawnga Anthurium Festival buatsaih dan tur sawiho a ni. Festival hi October 1-3, 2026 chhungin hman a ni dawn.

Lalnghinglova Hmar chuan, Anthurium Festival chu Tourism leh Horticulture department-te bultuma buatsaih tur ni mah se, Mizoram sorkar buatsaih a nih angin sorkar department dangte leh Mizoram mipui kan tel vek thu a sawi a, "Mizoramah tourism a ṭhang nasa a, khualzin an pung a, sum leh pai che vel a pung; a hlâwkna téltute chu dawrkai te, taxi driver te, thingpui dawr neitu te, Mizo mipuite kan ni," a ti.

Kumina Anthurium Festival-ah tualchhung mai bakah, state páwn lam mi a tam thei ang ber an tel theih nan ṭan lak a ngaih thu Tourism Minister chuan a sawi bawk.

Ṭhutkhawmah hian sorkar department hrang hrang, YMA, Reiek leh Ailawng khawtlang hruaitu te, Zo Anthurium Grower Society, event management team leh Mizo Indigenous Games hruaitute an tel a; tih tur leh mawhphurhna te, an thlen chinte leh inbuatsaih dante an tarlang.

Festival-ah hian cultural programme bakah adventure lam hawi - trekking, cave exploration (Khuangchera Pûk, Thawmpawnga Pûk and Ngaitei Pûk), silai inkahsiak leh a dangte a awm dawn. Naupang infiamna hmun te, pangpar huan tlawh tur te, Mizo infiamna chi hrang hrang entir leh kût chhimtu mipui náwlpui tel theihna tur thil chi hrang hrang buatsaih tum a ni. Zaithiam larte sáwmin, Leikapui Night leh concert buatsaih tum a ni bawk.

Anthurium Festival laia lirthei chet velnaa harsatna awm theite leh kawng chei ṭhat chungchang sawiho a ni a; Festival chhim turte bakah, Reiek kawng paltlang ngai zin veivakte'n harsatna an tawh loh nan ngenna leh hriattirna travel advisory tihchhuah ni se, an ti.