AMPEDA-in pump khâr tum an ṭhulh
All Mizoram Petroleum Dealers Association (AMPEDA) chuan petrol pump-te laka MZP chêt dan an duh loh avanga vawiin September 17 aṭanga Mizorama filling station (petrol pump) zawng zawng khar an tum chu an ṭhulh.
Tihluihnaa pawisa inpek chungchanga AMPEDA leh MZP inkara harsatna awm avang hian pawl pahnih hruaitute chu nimin khan Home secretary Vanlalmawia kaihhruaiin a pisaah an inkawm a, harsatnate an sawiho a ni.
AMPEDA chuan thuchhuah siamin, "Harsatna kan tawh mek dante leh hun lo la awm tura a pumpelh dan turte kan sawiho hnuah mipui (customer)-te tan harsatna a thlen loh nan kei ni AMPEDA chuan September 17, 2026 (Ningani) aṭanga Mizoram puma petrol pump khar kan tum chu kan ṭhulh (call-off) ta a ni," an ti.
AMPEDA hian September 10, 2026 khan thuchhuah siamin, filling station-a thawk pump manager chu MZP-in an pisaah hréngin, tihluihnain September 7, 2026 khan an bank account no. 10763514287 (SBI Main Branch)-ah Rs 2,00,000 an thun (transfer)-tir thu leh, pump dang ṭhenkhatah cheng nuai 1.2 account no. 10763514287-ah transfer tura an tih thu an tarlang. MZP chu September 16, 2026 ral hmaa pawisa pe kîr turin an phût a, an pek kir loh chuan September 17 aṭangin tiam chin awm loin pump zawng zawng khâr an tum a ni.
MZP erawh chuan September 23-25, 2026-ah Darlawnah inkhawmpui an hmang dawn a, chumi atan chuan LT Brothers Filling Station, Keifangin sum an rawn thawh thu tarlangin, "Tihluihna leh kut inthlakna pakhat mah a awm lo," an ti.