Hnam leh Kristianna timualpho thei záwnga awm lo turin inchah

Calcutta Mizo Welfare Association (CMWA) chuan thuchhuah siamin, Kolkata leh a chhehvela Mizo awmte chu an inchei danah te, cheziaah leh ṭawngkamah te Mizo hnam leh Kristianna timualpho thei záwnga awm lo turin an chah.

CMWA chuan, Mizote chu Kolkata leh a chhehvelah Mizo hming tichhe thei záwnga awm lo a, Zo nun ze mawi - tlawmngaihna, aia upa zahna, hawihhâwmna, rinawmna, taimakna leh huaisenna lan chhuahtir zawk turin an chah a, "Hnam dang kâra awm kan nih avangin, mahni duh ang anga awm loin, kan inchei dan, kan chezia leh kan ṭawngkamah Mizo hnam leh Kristianna timualpho thei záwnga awm loin, a timawitu zawk nih tum ṭheuh ang u," an ti.

Mawi lo taka hnam dang kawp chungchang tarlangin CMWA chuan, "Nupui pasal ni si lo nupa anga awm dun te, ruih theih thil lama inhman te leh hnam leh sakhuana tihmingchhe thei thil rêng rêng lakah inthiar fihlim tur a ni," an ti a; chutiang zawnga inhmang lui an awm a nih chuan CMWA danin a sawi angin an chungah a ṭul ang zelin hma an lak dawn thu an tarlang.

CMWA chuan, Mizo zingah Kolkata leh a chhehvala harsatna tâwk an awm chuan, CMWA hruaitute hnena thlen hreh lo turin an chah a, "CMWA chuan theih ang angin, kan phâk tâwk ang zelin harsatna su kiang turin hma a la zel ang," an ti.