Mizo inneih leh rokhawmna dan chungchangah inrawnkhawm a ni

National Commission for Women (NCW) leh Mizoram State Commission for Women (MSCW) chuan nimin khan Planning conference hall-ah Mizo inneih leh rokhawmna dan, 'The Mizo Marriage and Inheritance of Property Act, 2014' chungchangah inràwnkhawmna an buatsaih a, Social Welfare, Women & Child Development minister Lalrinpuii'n a hmanpui.

Inrawnkhawmna hi MSCW chairperson C Zodinpuii leh Legal Cell member T Lalnunsiama ten an kaihruai a, tlawmngai pawl leh kohhran hruaitute bakah, mithiamte an tel. Inneih, inṭhen leh rokhawm chungchangte a hran ṭheuha zirhona hun hman niin, rawtnate ngaihthlak a ni a; rawtna lutte chu MSCW-in thlifimin, sorkarah an thehlut dawn a ni.

Lalrinpuii chuan, The Mizo Marriage & Inheritance of Property Act 2014 chu kumin 2026-ah siamṭhat (amend) a nih thu sawiin, "Mizo mipui, a bik takin hmeichhiate dinhmun nasa taka nghawng thei dan pawimawh a ni. Mizoram sorkar chuan hmeichhiate dinhmun ngai pawimawh tak chungin dan siamṭhatah pawh sum chhuaha nupa an inṭhenin hmeichhiate'n nupa thawh chhuah aṭanga 50% thlengin an hauh ve theihna turte telh a ni," a ti.

Sorkarin hmeichhiate hamṭhatna, an dikna leh chanvo humhalhsak te a ngai pawimawh thu sawiin Minister chuan, "Hemi kaihhnawihah hian MSCW chuan kum 2014 aṭanga vawiin thlengin case 545 a dawng tawh a, chu'ng zinga case 535 chu chinfel a ni," a ti a; theihtawp chhuaha Mizo hmeichhe dinhmun kaihhnawih dan ennawn chu MSCW mawhphurhna a nih thu sawi.