KHAWTHLIR

Thisen pe

Central Higher Secondary School NSS unit chuan nimin khan Civil Hospital, Aizawl tan thisen unit 30 an pe a, petute mipa 17 leh hmeichhia 13 an ni.

2wheeler tan chauh

Vaivakawn Zohnuai leh Ropaiabawk inkar kawng, RK Road péng bulah September 15, Thawhlehni zan khan kawngpui a bal a, lirthei ke pali nei tan kal tlang theih a ni lo. Aizawl Traffic SP C Vanlalvena chuan thuchhuah siamin, kawng bal chu siam tura ruahman a nih avangin, siam zawh hma chuan two wheeler chauh tlan phal a nih thu a tarlang.

Attendants shelter

Serchhip DC Paul L Khuma hoin nimin khan Serchhip District Executive Committee under Shelter for Urban Homeless, DAY-NULM an ṭhu. Serchhip District Hospital ram chhunga damlo awmpuitute thlenna tura siam Patient Attendants' Shelter chungchangah, contractor-in final bill 15% (4th instalment) a dilna an pawm a, Shelter chu hman ṭangkai thuai a nih theih nan chak taka hmalak chhunzawm an rêl.

Pluck & Pay

Nimin khan Pluck & Pay Organising Committee chu Khawzawl bawrhsap Vanlalṭhiana kaihhruaiin DC conference hall-ah an ṭhukhawm a, Pluck and Pay (lo la, lei rawh) Festival neih tura inpuahchahna an thlirho. Pluck and Pay Festival hi September 23-25, 2026 chhung neih tur a ni a, a hawnna inkhawm hi Tualte ah neih tur niin, Chawngtlaiah a kharna hun hman a ni dawn. He festival hi tourism tihhmasawnna kawnga khawtlang nena ṭanrual (community-based tourism) lama hmalakna niin, a thlengtu khuaten hlawkpui ber se tih chu sorkar duh dan a ni.

Thawhho dan tur sawiho

Nimin khan Khawzawl bawrhsap K Vanlalṭhiana kaihhruaiin sorkar laipui scheme VB-GRAM-G kalpui kawnga department hrang hrang thawhho dan tur DC conference hall-ah sawiho a ni. Bawrhsap chuan he scheme hnuaiah hian mipui hmasawnna tur leh an eizawnna kawnga puitu tur hna thawh a pawimawh thu a sawi.