District pathuma mi 649 hnenah ṭanpuina sum sem

Nimin khan Lunglei DC conference hall-ah Chief Minister's Special Package Phase-II hnuaiah Lunglei district-a progress partner mi 509 hnenah ṭanpuina Rs 2,54,23,000 leh Hnahthialah mi 74 hnenah ṭanpuina Rs 37,00,000 sem a ni a; Mamitah mi 66 hnenah sem a ni bawk.

Lunglei district-ah CM's Special Package Phase-II dawng turin mi 509 thlan an ni a; AH & Vety department hnuaiah mi 287, Commerce & Industries-ah 145, Horticulture department-ah mi 47, Fisheries department-ah mi 15, Agriculture department-ah mi pasarih, Tourism department-ah mi pathum, UDPA leh Sericulture-ah mi pahnih ve ve leh, Cooperation department-ah mi pakhat an ni.

Hnahthial district-ah chuan mi 74 hnenah ṭanpuina sem a ni a; Horticulture department hnuaiah mi 25, AH&Vety department-ah mi 39, Agriculture leh Commerce & Industries-ah mi panga ve ve an ni bawk.

Mamita ṭanpuina dawngtu progress partner 66-te hi AH & Vety department hnuaiah mi 34, Cooperation department hnuaiah 13, Agriculture, Sericulture leh Commerce & Industry department hnuaiah mi panga ṭheuh leh Fisheries, Tourism leh Horticulture department hnuaiah mi pakhat ṭheuh an ni.

Lungleia ṭanpuina sem inkhawma khuallian Lunglei High Powered Committee (HPC) vice chairman V Malsawmtluanga, MLA chuan, Bána Kaih scheme chu Mizoram sorkar flagship a nih angin a hlawhtlin theih nan sorkarin theihtawp a chhuah thu a sawi a, "Bána Kaih hlawhtlinna atana sorkar leh sorkar hnathawkte ṭhahnemngaihna leh thawhrimna hi a thlawna a luan ral mai loh nan progress partner-te’n theihtawp chhuaha hma an lak a ṭul," a ti.

CM's Special Package dawngtute chu sum an dawnte a nih dan tur takin hmang a, hma sâwnpui ngei tum turin V Malsawmtluanga chuan a chah a, "Sorkarin kut hnathawktute a ngaih pawimawh avangin an hmasawnna tur leh chawikan an nih theihna tur te, awlsam leh hlawk zawka an thar chhuah deh ralna tur atante hma a la zel a ni," a ti bawk.

Hnahthiala ṭanpuina semna hun hmanpuitu bawrhsap K Vanlalruati chuan, progress partner-te chu ṭanpuina pek an nih chhan ang taka sum hmang turin a chah a, "Thawkrim leh a phû tura ngaih, department-te'n an thlan chhuah in ni a, thlan in nih chhan ang ngeiin hma la tura beisei in ni," a ti.

Mamitah chuan CM Special Package Phase-II hnuaia progress partner atana thlan mi 66 hnenah bawhsap Suvigya S Chandra chuan certificate a hlan a; training leh orientation hun hman a ni bawk.