Aizawlah School Connect buatsaih mek

Mizoram Youth Commission (MYC), Zalen chanchinbu leh Lynchpinn te chuan Chaltlang Higher Secondary School-ah ni nga awh tur zirlaite hma hun sawihona, School Connect 2026 an buatsaih a, nimin khan MYC chairman Malsawmzuala Ralte-in a hmanpui.

School Connect 2026 hi September 14-18, 2026 chhung buatsaih a ni dawn a, phai aṭangin university 10 an tel a, Aizawla higher secondary sikul 10 aṭangin zirlaite'n an chhim a, career counseling neihpui an ni.

Malsawmzuala Ralte chuan, sorkar hnaa inziak tling turin T panga - tumruhna, taimakna, thawhrimna, teirei peihna leh time table mumal tak siama zawm tlat a pawimawh thu a sawi a, "T-5 nei lo tan inelna sang lutuk tawhah hian sorkar hnaa inziah tlin a harsa tawh," a ti.

MYC Chairman chuan, rilru puthmang tihzauh a ṭul thu sawiin, "Private hnuaia thawk, corporate-a thawk, mahnia sumdawng leh mahnia inchâwm ve thei pangngaite hi sorkar hnathawk kan en dan ang chiaha kan en a ṭul," a ti a; corporate leh company hnuaia thawkte en hniam tur an nih loh thu a sawi.