Union Sports Minister-in Saitual a tlawh

Union Youth Affairs & Sports minister of state Raksha Nikhil Khadse chuan September 15, Thawhlehni khan Saitual district a tlawh a, sorkar deparment hotute leh sport association hruaitute nen an inkâwm. Nimin khan Saitual District Hospital a tlawh bawk.

Sorkar deparment hotute leh sport association hruaitute nen an inkawmnaah Raksha Nikhil Khadse chuan, sorkar department hotute chu tualchhung mi an nih angin tualchhung mite tana ṭan la lehzual turin a fuih a; central scheme hrang hrangte mipuiin an hlâwkpui lehzual theih nan chak lehzuala hma la turin a chah.

Union Minister chuan, "Nupangte'n sikul an kal laia an theihnate hai chhuah a nih theih nan infiamna lama inrelbawlna leh hmunhmate tihhmasawn a ṭul," a ti a; ṭhalaite'n ruihhlo an tih loh nan Mera Yuva Bharat kaltlangin ṭhalaite'n ruihhlo donaah ke pên se a duh thu a sawi.

Raksha Nikhil Khadse chuan, Mizoram chu organic farming-ah a sàn thu sawiin, "Mumal taka thlai leh thei tharte sawngbawl (food processing) a nih theih chuan ram dangah hlêp tam lehzuala thawn chhuah theih a nih ka beisei," a ti.

Union Sports Minister hian nimin khan Saitual District Hospital a tlawh a; khum 50 awm theihna tur District Hospital sak meka hnathawhah hmabak a la tam thu sawiin, hun tiam chhunga zawh a nih theih nan ṭan la turin thuneitute a chah. District Hospital-a thawkte'n mamawh leh harsatnate an lo thlen nghal a ni.