Bána Kaih dilna lutte endik a ni

Mizoram State Policy Coordination Committee (MSPCC) chuan nimin khan vice chairman Dr KC Lalmalsawmzauva, adviser to CM hoin an ṭhukhawm a, Bána Kaih scheme phase-II hnuaia dilna lutte an endik.

Dr KC Lalmalsawmzauva chuan Bana Kaih Scheme hnuaia tanpuina chu a thlawn a sem a ni lo tih sawiin, "Chuvangin, a dawngtu tur thlan chhuahna kawngah pawh Implementing department-a nodal officer-ten mi rintlak, hmasawn tum tlat, taima leh thiamna hmantlak neite thlan chhuah an nih ngei theih nan, dilna lutte thlitfim kawngah uluk leh fimkhur taka kalpui a pawimawh," a ti.

Bana Kaih Scheme phase I leh II kalpui chhungin sorkar hnuaia Implementing department leh partner bank hrang hrangte ṭhahnemngaihna leh inpekna avangin Mizoram khaw hrang hrangah chhungkaw thahnem takin eizawnna ngelnghet an neih phah mek thu sawiin Dr KC Lalmalsawmzauva chuan, mipui rawngbawl tura Bana Kaih Scheme tih hlawhtlin nana thawktu pawimawh tak an ni tih hre reng turin nodal officer leh bank hotu kalkhawmte chu a chah.

Bana Kaih Phase-II kalpui mekah Chief Minister's Special Package dilna 910 leh Bana Kaih loan component dilna 106 endik a ni a; dilna lutte chu a changtu department-a nodal officer-te'n an endik tawh dante an sawifiah.

Ṭhutkhawma tarlan danin, CM's Special Package dilna 910 lutte chu - AH&Vety department aṭangin 496, Horticulture department aṭangin 185, Commerce & Industries aṭangin 119, Land Resources, Soil & Water Conservation aṭangin 69, Fisheries aṭangin 19, Information and Communicatoin Technology aṭangin paruk, Agriculture aṭangin panga, IPR aṭangin pahnih leh Tourism aṭangin pakhat a ni.

Loan component dilna 106 lutte chu implementing department-a nodal officer-te'n a mal te tein an sawifiah a; MSPCC member-te nen uluk takin zir chian niin, siamṭhat ngai, thlak danglam ngai leh paih ngaite endik a ni.

September 18, 2026 aṭangin Bana Kaih Phase-III kalpui ṭan leh turin inbuatsaih chhoh mek a ni bawk.