Skywalk & Ropeway Case: An thubuai titawp tura mi 3 ngenna Special Court (PC Act)-in a hnâwl

Sakawrhmuituai Skywalk leh Chaltlang-Durtlang Ropeway siamnaa sum tihchingpen chungchanga thubuai nei mi pathum, MLA ni mek pakhat leh MLA hlui pahnih ten an thubuai titawp tura an ngenna chu Special Judge (Prevention of Corruption Act) & Mizoram Lokayukta Act, 2014 F Rohlupuia chuan a hnâwl.

Skywalk leh ropeway siam chungchanga thubuai nei mi pathum - Tourism minister hlui pahnih John Rotluangliana leh Robert Romawia Royte (tuna Hachhek bialtu MLA) leh MLA hlui Lalrindika Ralte te chuan, thubuaiah hian inhnamhnawihna leh tih dik loh an nei lo nia insawiin, an thubuai titawp tura ngenna an thehlut a ni.

Special Judge chuan mi pathumte ngenna chungchangah hian September 16, Nilaini khan thutlukna a siam a, mi pathumte ngenna chu thu tling loa ngaiin a hnâwl. Judge chuan, a thutlukna avang hian mi pathumte chu an dik lo tihna emaw, an dik tihna emaw a nih loh thu tarlangin, "Prosecution-te'n an chhui chhungin finfiahna rintlak tak an nei tur a ni," a ti.

Mi pathumte'n Special Judge (PC Act)-in June 24, 2026-a thubuai kalpui zel tura a tihna paihthla tura an ngenna chu Gauhati High Court Aizawl Bench pawhin August 24, 2026 khan a ngaihtuah tawh a, Trial Court (Special Court, PC Act)-in a khawih tho avangin, hearing chu case awm dan (on its own merit) aṭanga neih turin, a ti a ni.

Special Judge-in June 24, 2026-a thutlukna a siam, an thubuai kalpui zel tura a tih chu mi pathumte chuan Gauhati High Court-ah an khing a ni. Thubuai neite hi an thiam thu sawina hun pe loa an thubuai kalpui zel chu a dik lo tiin an ukilte chu High Court-ah an zualko a; an thiam lohna ngaihtuah chiang hmasa loa an thubuai kalpui zel chu dan kalh a nih thu an thlen.

Thubuai thehluttute hian an thubuai kalpui zel tlak a nih lohzia an dilna chu ngaihtuah a nih hmaa thubuai kal zel chu a dik lo, an ti.

Gauhati High Court chuan ukilte remtih tlanna angin thubuai neite'n chhuah zalen an dilna chu ngaihtuah tura Trial Court (Special Court, PC Act) lamin a tih tho avangin hearing chu case awm dan (on its own merit) aṭanga nei turin a ti. Special Judge chuan mi pathumte dilna a ngaihtuah hnuah a hnâwl ta a ni.

Thubuai hi Anti Corruption Bureau (ACB) chuan chhuiin, chargesheet no. 2/2026 dt 10.03.2026 chu Special Judge (PC Act) Court, Aizawlah an thehlut. Chargesheet an thehluhah hian John Rotluangliana, Robert Romawia Royte leh Lalrindika Ralte te hming a lang a ni.