AMC ward pasariha bawlhhlawh chi 4-a thliar kalpuina tur Minister-in a hawng

Aizawl Municipal Corporation (AMC) ward pasariha bawlhhlawh chi lia thliarna '4-Stream Waste Segregation' leh, in aṭanga bawlhhlawh lak khawmna 'Door to Door Collection' kalpui tur chu nimin khan UDPA minister K Sapdanga'n AMC Auditorium-ah a hawng.

4-Stream Waste Segregation & Door to Door Collection Phase-I hi nimin aṭang khan AMC ward III, VI, VIII, XI, XIII, XVI leh XVIII-ah te kalpui ṭan a ni a; bawlhhlawhte chu ṭawih thei (wet waste), ṭawih thei lo (dry waste), sanitary waste leh special care waste-ah te thliar hran tur a ni.

Local council-te ruahmannain in tinah bawlhhlawh thliar sa tur niin, la khawmtute'n an in aṭangin an lak khawm sak dawn a; bawlhhlawh thliar a nih leh nih loh Tuiriala bawlhhlawh sawngbawlna, Solid Waste Management Centre-ah AMC-in an endik ṭhin dawn.

K Sapdanga chuan, bawlhhlawh chi lia thliar leh in aṭanga lak khawmna chu thil thar a nih avangin harsatna eng emaw a awm ngei a rin thu sawiin, "Tlawmngaihna hi faina nena kan suih zawm tlat chuan kan nunah a bet ang a, kan fai ang a, kan faina a tlo bawk ang," a ti a; India rama khawpui fai an tihte aiin Aizawl chu a hniam vak bik loh thu a sawi rualin, hmasawnna tur tam tak a la awm thu a sawi.

4-Stream Waste Segregation & Door to Door Collection chu Mizoram tana mellung thar a nih thu sawiin UDPA Minister chuan, "Faina hi ram leh chhungkaw changkang leh changkang lo tehna a ni a, kohhran leh pawlte leh social activist-te nen thawhhona ṭha tak kan neih a pawimawh," a ti. Faina atana sorkar hmalaknate'n a tum ber chu faina chìn ṭhan (habit)-a neih a nih thu a sawi bawk.

Inkhawmah hian khualzahawm chief secretary Khilli Ram Meena leh Aizawl mayor H Lalremtluanga te pawhin thu an sawi a; 4-Stream Waste Segregation & Door to Door Collection Phase I-in a huam chhunga Ward Committee leh LC aiawhte an tel a ni.