KHAWTHLIR

HBC-in thisen pe

Hrangbana College NSS unit chuan nimin khan an college Golden Hall-ah Civil Hospital, Aizawl tan thisen unit 90 an pe. Thisen petute hi BA first semester zirlaite niin, mipa 79 leh hmeichhia 11 an ni. September 15, 2026 khan HBC-a BA third semester zirlai mipa 75 leh hmeichhia 17 ten Aizawl Civil Hospital tan thisen unit 92 an lo pe tawh bawk.

CM nen inkâwm

Thy Kingdom Come Conference hmang tura Mizorama rawn kal, pastor Shan Kikon leh a nupui Akumtila Kikon leh, an rawngbawlpuite chuan nimin khan chief ministe Lalduhoma a pisaah an hmu. Pastor Shan Kikon leh a team-te hi minister of state F Rodingliana chuan nizan khan zanriah a buatsaihsak. Thy Kingdom Come Conference hi September 18-20, 2026 chhungin Vanapa Hall-ah neih a ni ang.

VUC-in sawifiah

ZPM Val Upa Council (VUC) Secretary chuan, VUC member K Lalnghinglova chu Mizoram State Human Rights Commission member atan August 2026 tàwp lamah ruat a nih thu tarlangin, "Ruat a nih hma hian bànna a thehlut a, a aiah Upa C Lalramthanga ruat a ni tawh," a ti. Vanglaini September 16, 2026-a PL Liandinga article-ah, VUC member zingah sorkara nihna chelh an awm nia a sawi chu hriat sual palh vang a nih thu a tarlang bawk.

BJP-in thisen pe turin an sáwm

BJP, Mizoram chuan thuchhuah siamin, 'Seva Sankalp Abhiyan' an kalpui mek hnuaiah vawiin chawhma dar 10 aṭangin IPR Auditorium, Treasury Square-ah thisen pek rûnpui an buatsaih dawn tih an tarlang. Thisen pek rûnpuiah hian thisen pe turin Mizoram BJP chuan mi tin an sâwm a ni.

Meth 50,500 man

Excise & Narcotics department leh Assam Rifles chuan September 16, Nilaini tlai dar 4:10 khan Champhai Zote leh Bulfek inkar kawngah methamphetamine mûm 50,500 (kg 5.500) leh a neitua puh Kamkimsiang (20), Bukphir, Myanmar-a khawsa nia inchhál an man. NDPS Act 1985 tlawhchhanin thubuai ziah luh a ni a, Kamkimsiang hi nimin khan court-ah hruai a ni.

Hmanrua sem

Social Welfare department leh Toyota Kirloskar Motor hmalaknain nimin khan Lunglei Zotlanga DPO conference hall-ah mitdel leh khaw hmu fiah lo mi 56 hnenah awlsam zawka an veivah theihna tur hmanrua - safe mobility device sem a ni. Hmanruate hi Toyota Kirloskar Motor-in corporate social responsibility sum hmanga an lei a ni.