District-ah Swachhata Hi Seva hawn a ni

Nimin khan district khawpuiah faina beihpui thlakna, Swachhata Hi Seva hawn a ni a, thupui chu 'Swachhata Mein Sahbhag, Swachh Bharat, Viksit Bharat' tih niin, a tum ber chu – mipui huapzo hmalakna, mipui zawng zawng telna leh thawhhona hmanga ram fai, thianghlim leh nuam siam a ni.

Swachhata Hi Seva hi Siahaah chuan bawrhsap Saizikpuii'n DC conference hall-ah a hawng. Additional DC Abraham Beirazi Khithie kaihhruaiin Swachhata Hi Seva neih tura hmalakna turte sawiho a ni.

Champhaiah chuan bawrhsap Mohammed Aaquib-a'n IPR Auditorium-ah a hawng a, Solid Waste Management Rules 2026 inzirtirna hun hman nghal a ni. Bawrsap chuan, "Fainaa hmasawn hi India hnam pa Mahatma Gandhi hmathlir a ni," a ti.

Kolasib-ah chuan DC conference hall-ah additional DC B Malsawmtluangi'n a hawng a; Kolasib chu khawpui fai inelnaah top 3-ah a la lan ngai loh thu sawiin, "District dangte pawh pakhatna an nih theih chuan Kolasib pawh kan ni ve thei," a ti a; fainaah ṭan la thar turin district mipui a sawm.

Serchhip bawrhsap Paul L Khuma chuan DC Pisapui Hall-ah Swachhata Hi Seva a hawng a; faina hna thawh chu rawngbawlna a nih thu sawiin, "Faina hi inthununna leh mi dangte zahna lantirtu, darthlalang anga mi nihna dik tak lantirtu a ni. Khawtlang nuam leh hrisel, ram nuam siam turin mi tin kan thawhho a ngai," a ti.

Lawngtlaiah chuan DC office-ah DRDO project director H Zonunmawia'n faina beihpui thlakna a hawng a; Lawngtlai district chu fainaah a chhuanawm loh thu sawiin, ṭan la thar ṭheuh turin district mipui a sáwm.

Swachhata Hi Seva hi Saitual district tan SDC J Lalawmpuia'n Saichal péngah a hawng a; fainaah Saitualin hma an sawn hle tih sawiin, theihtawp chhuah zel turin mipui a chah.

Khawzawlah chuan bawrhsap K Vanlalṭhiana'n faina beihpui thlakna a hawng a; faina leh thianghlimna chu nunpui a ngaih thu sawiin, "Fai ringawt a tâwk tawh lo a, him leh felfai zawka bawlhhlawh sawngbawl a pawimawh tawh," a ti.