NE-ah sorkar sikula lut duh an tlem - Dr Vanlalthlana
JP Park & Banquets, Naga-land-ah North East Education Conclave 2026 neih mek a ni a; Education minister Dr Vanlalthlana pawh telin, hmarchhak state-ah sorkar sikula lut duh an tlem thu a sawi.
Dr Vanlalthlana chuan, Mizoramin zirnaa hmasawnna a hmuhte leh NEP 2020 chungchanga chona an hmachhawn dante a sawi a; zirna hmasawnna tura ruahmanna siam kawngah state lian zawkte anga hmarchhak state-te hrût rual mai lo tur leh, hmarchhak state-te'n harsatna inangtlâng an tawhte sutkianpui turin sorkar laipui a ngen.
Dr Vanlalthlana chuan, Mizoram chauh ni lo, hmarchhak state dangah pawh sorkar sikula lut duh naupang an tlem thu sawiin, "Pawl hniam lamah sikul naupang tlemtê chauh neia elementary school eng emaw zat a awm laiin, secondary school chin nei thei thingtlang khua an tlem. DIET leh SCERT kan neihah thawktu indaih lohna a nasa," a ti.
Internet-a harsatna, zirna hmasawnna atana thawktu lak belh leh hmasawnna ruhrel dinna turah sum lama harsatna awmte chinfelpui turin Education Minister chuan sorkar laipui a ngen a; harsatnate chu Mizoramah bik chauh ni loin, hmarchhak state tam zawk harsatna a nih thu a sawi.
Dr Vanlalthlana chuan, zirtirtu thiam leh ṭha la tura Mizoram hmalakna sawiin, "Standardised Assessment for Elementary Schools kalpui a ni a, Vidya Samiksha Kendra kan hman ṭangkai hle. Sikul zirlaite'n an puitlin huna sum leh pai enkawl dan leh sumdawnna kawnga hma an lak dan tur inzirtirna Project Intodelh kalpui a ni," a ti.
Education Minister hi Mizoram Education Reforms Committee working chairman Prof. Lalbiakdiki Hnamte, SCERT director Caroline Zoramthangi, SCERT joint director Dr Lalduhawmi Thomte leh official dangte an ṭawiawm a ni.