BJP-in thisen pek an huaihawt

Mizoram BJP chuan 'Seva Sankalp Abhiyan' an kalpui mekah nimin khan IPR Auditorium, Aizawlah thisen pek rûnpui huaihawtin, Civil Hospital, Aizawl tan thisen unit 38 an pe a, petute mipa 36 leh hmeichhia pahnih an ni.

Lunglei district BJP pawhin September 17, Ningani khan Civil Hospital, Lunglei tan thisen unit 38 an pe a, petute mipa 31 leh hmeichhia pasarih an ni.

Aizawla thisen pek runpui puala inkhawm buatsaihah BJP president Dr K Beichhua chuan, "BJP Mizoram chuan mipui tan engtin nge kan luan chhuah ve theih ang a, mipui tan eng nge ṭangkaina kan neih ve ang tih ngun taka kan ngaihtuah hnuin, programme hrang hrang duan zingah thisen pek hi a pawimawh berte zinga pakhat a ni," a ti.

Dr K Beichhua chuan, thisen pêk duhna thinlung pute chu Pathian rilru putute an nih thu sawiin, "Khawvelah hian manganna tâwpkhâwk eng nge ni, ti ta ila, sum kan neih loh vanga manganna emaw ai chuan, thih ngam khawpa dam lohna avanga manganna hi a raptlak zawkin a rinawm," a ti a; thisen pek chu mi nunna chhanna a nih avangin, uar zel turin kal khawmte a chah a ni.