Bungzungah Cutural Meet hmang; Hnam lâm zahpui tur a ni lo - Sawivunga

Art & Culture department leh Bungzung Branch YMA chuan nimin khan Bungzung High School tualah Cutural Meet an hmang a, Art & Culture minister C Lalsawivunga'n hmanpuiin, Mizo hnam lâm chu zahpui tur a ni lo a, thiam ngei zawk tur a nih thu a sawi.

C Lalsawivunga chuan, Cultural Meet chu hlimhlawp leh nuamtâwlna atan ringawta buatsaih ni loin, Mizo hnam nu leh thil hrang hrangte hriat tharna leh ngaihhlut tharna atana buatsaih a nih thu a sawi a, "Culture kan tih hian zai leh lâm a ni mai lo a, kan ni tin nun thlengin a keng tel. Kan hnam làm kan thiam tur a ni a, kan zahpui tur a ni lo," a ti.

Zaimite'n hlan leh zai hmangin Mizo nihna an pho chhuak ṭhin tih sawiin Minister chuan, "Mipui pawhin Mizo kan nihna kan ni tin nunah kan pho lan a ngai. Kan culture leh society chawi sanga chawi nung turin bat kan nei vek a, ṭhang zel turin kan inbuatsaih pawh a ngai," a ti a; chutiang atan chuan Cultural Meet chu malsawmna ni se a duh thu a sawi.

C Lalsawivunga chuan, tlawmngaihna tivul thar leh turin Meet hmangtute sáwmin, "Aia upa zahna pawh tunlaiah a tlahniam ta hle niin a lang a, hemi atan hian chhungkaw tinah inzirtirna kan neih thar leh a pawimawh tak zet. Rinawmna, taimakna leh dikna lo vul thar leh se, intodelhna kawng zawh turin hma lam i pan zel ang u," a ti.

Art & Culture Minister hian Bungzung khuaa Mizo hmun hlui Sikpui Lung chawibawla humhalh nan Rs 1,20,000 ruahman tawh chu a beitham deuha an hriat avangin sum an pek belh dawn thu a sawi bawk.

Bungzung Cultural Meet hi YMA president Laltlansanga'n a kaihruai a; Tuipuiral Group YMA chhunga YMA branch hrang hranga cultural troupe 11-in Mizo hnam lâm an entir bakah, zaithiamte an zai a ni.

Art & Culture joint director F Lalthanmawia chuan, Art & Culture department-in khaw pariatah Cultural Meet an buatsaih dawn thu sawiin, Bungzunga an buatsaih chu a bul ṭanna a nih thu a sawi.