MPS officer-te'n khawmpui an hmang; 'Police hmalakna a chhuanawm' - Sapa

Mizoram Police Service Association (MPSA) chuan nimin khan Arya Mess, Police Headquarters-ah Annual Conference vawi 16-na an hmang a; khuallian K Sapdanga, Home minister chuan Mizoram Police hmalakna chhuanawm a tih thu a sawi.

Home Minister chuan, ruihhlo donaa Mizoram Police hmalakna chhuanawm a tih thu sawiin, "Myanmar aṭanga dan loa kuhva rah rawn kal do kawngah pawh kan thawk ṭha hle. Kan sipaiten huaisen taka an thawh theih chhan hi officer-te'n huaisen tak leh awmze neia in kaihhruai ṭhin vang a ni. Dan leh thupek kenkawh hna tha taka thawk thei tur chuan khawtlang mipui telna (community participation) hi tihmakmawh a ni," a ti.

Mizoram chu khawvela community force nei ṭha ber pawl a nih hial a rin thu sawiin Sapdanga chuan, "Community force-in sorkar a puihbawm ṭhat berna pawh kan a ni àwm e. He thawhhona mawi tak hi chhawm nung zel turin taimakna leh hawihawmna kan neih a ngai," a ti a; police-te chu hna an thawhna theihtawp chhuah zel turin a fuih.

Home Minister chuan, sorkar hna thawk zingah police-in mipui mit an la bik tih sawiin, "Kan laka mipui beisei a sang bik a, kan lakah mipui thîkthu pawh a chhe bik. Police zingah pawh constable-te lakah ai chuan officer-te laka mipui beisei chu sang tak a ni," a ti.

Police zingah officer-te mawhphurhna a san zual thu sawiin Minister chuan, "Mipui hriat phaka kan ṭawngkam leh mipui hmuh phaka kan chezia fimkhur hle a ngai. Mipui-te'n police an mamawh huna an tluk luhna hmasa ber chu police station leh outpost-te a ni a, thana-ah hian Police pumpui hmel hi a lang ṭhin," a ti a; thanate chu mipuiin police an tehna lian tak a nih thu a sawi.

Home Minister chuan tun hnaiah cyber crime lam a pung tih sawiin, "India ramah chauh ni loin, ram hrang hrang buaipui lian tak a tling. Kan sorkar pawhin a theih ang angin ṭan a la a, hmabak erawh kan la nei nual awm e. Kan neih chhun ang ang hmang ṭangkai thiam turin theihtawpa ṭan lak a ṭul," a ti.

MPSA inkhawmpui hi an president Vanlalfaka'n a kaihruai a, DGP Sharad Agarwal pawhin thu a sawi. Chawhnuah ro an rel bakah, an member pension-te an thlahna leh IPS-a kaisangte lawmpuina hun an hmang a ni.