KHAWTHLIR

CM pui turin ruat

Champhai South bialtu MLA Lt Col. Clement Lalhmingthanga chu Chief Minister pui turin Governor hminga ruat a ni. CM a puihna tura tarlante chu - Territorial Army, Indian Army, Bharat Scouts and Guides, National Cadet Corps leh Railways chungchangahte a ni.

Senior inkhawmpui

Mizoram Presbyterian Kohhrana Senior department-te chuan naktuk Pathianni hmang hian pastor bial hrang hrangah inkhawmpui an hmang dawn. Bial tam takah chuan naktuk Pathianni-ah chauh an hmang dawn a, bial ṭhenkhatah chuan zaninah an ṭan ang. Mizoram Synod hnuaiah kum 1954 khan Senior department din a ni a, kuminah hian zirlai 34,132 leh zirtirtu 5,495 an awm anga chhinchhiah a ni.

Heroin man

Assam Rifles leh Zokhawthar police chuan September 17, Ningani khan Zokhawthara Iron Gate-ah mipa pakhat hnen aṭangin heroin gram 28 an man. September 16, 2026 pawh khan Zokhawthar Iron Gate-ah tho Myanmar lam mi mipa pakhat hnen aṭangin heroin gram 14 an man bawk.

MPS pathum IPS-ah an kai

Sorkar laipuia Ministry of Home Affairs chuan Mizoram Police Service (MPS) officer pathumte chu September 16, 2026 khan Indian Police Service (IPS)-ah kaisantir an ni tih a tarlang. IPS-a kaite chu - Lalbiaktluanga (MPS 1996), Saidingliana (MPS 1996) leh Vanlalfaka Ralte (MPS 2004) te an ni a; AGMUT cadre pek niin, IPS-a an batch tur erawh notification-ah tarlan a ni lo.

Puanṭhui zirna

Adviser to chief minister TBC Lalvenchhunga, MLA chuan nimin khan Mizoram KVI Board-in Samarath Scheme hnuaia puanṭhui zirna an buatsaih chu Champhai Press Club-ah a hawng. Puanṭhui zirna hi Champhai district tan hmun pathumah buatsaih a ni dawn a; Ruantlangah mi 35 tan, Tlangsamah mi 25 tan, Electric Vengah mi 23 tan buatsaih a ni ang a, darkar 300 chhung puanṭhui an inzirtir dawn a ni.