MZU-ah International Day hmang

 Mizoram University chuan nimin khan an auditorium-ah International Day an hmang a, Home minister K Sapdanga khuallian niin, ICCR Guwahati zonal director (Northeast) N Munish Singh khualzahawm a ni. International Day hmannaah hian zirlaite'n hnam hrang hrang lâm an entir a; Department of Mizo hnuaia Herhse Cultural Club-in lemchan 'Mizo Lal Zakapa' an entir a, Pachhunga University College Chhawkhlei Cultural Club-in hnam lâm an entir. MZU-a ram pawn aṭanga zirte'n incheina chi hrang hrang entirna (costume parade) hun an hmang bawk.

Minister K Sapdanga chuan MZU-a ram dang aṭanga zirlai lutte chu duhsakna hlanin, Inner Line Permit (ILP) leh visa chungchangah harsatna an tawk a nih chuan thuneitute'n an lo ngaihtuahsak theih thu a hrilh a; Mizorama an awm chhungin thlamuang taka an awm a, hriat reng tlaka hun an hman a beisei thu a sawi.

University chu hnam hrang hrangte inkawmna leh hnam ziaráng an inzir tawn theihna a nih thu sawiin K Sapdanga chuan, "Mahni hnam tih dan phung leh ziarângte vawng tlat chungin, ram dang leh hnam dangte tih dan phungte hriatpui a, pawm thiam tura kan inzir a pawimawh," a ti a; hnam hrang hrang kara inbiakpawhna leh inhriatthiam tawnna ṭha a awm theihna tura MZU leh ICCR hmalakna chu chhuanawm a tih thu a sawi bawk.

International Day hmanna inkhawmah hian MZU vice chancellor Prof. Dibakar Chandra Deka leh MZU Office of International Affairs director Prof. HK Laldinpuii Fente te pawhin thu an sawi a; IFS officer chawl tawh pahnih Lalduhthlana leh Lalthlamuana bakah, G Vanlalsawma, FRRO hnenah chawimawina hlan a ni.