Council of Minister-in Bru lâk lêt hna November 30, 2019-ah tihtawp vek an rêl
Council of Ministers chu nimin khan Chief Minister's Office (CMO)-a Cabinet room-ah chief minister Zoramthanga hoin an ṭhukhawm a, agenda 15 awm sa bakah, agenda tih belhte an ngaihtuah. Cabinet chuan, Tripura-a awm mek Mizoram Bru-te Mizorama lak let hna rêng reng chu November 30, 2019 hnuah chuan tihtawp vek tawh turin an rêl.
Thu dawn danin, nimina Cabinet meeting-ah hian Bru chungchang hi agenda awm sa ni lo, meeting-a an belh a ni a; Tripura-a Bru refugee camp-a awm mek Mizoram khua leh tuite lâk lêt hna kal mek, October 3, 2019-a ṭan chu November 30, 2019-a zawh hunah chuan tihtawp vek tur leh a hnu leh zelah pawh Bru hruai kîr hna thawh tawh loh turin an rél a ni.
Mizorama infiamna leh a kaihhnawih thil chi hrang hrang kalpui dan tur ruahman, Draft Mizoram Sports Policy, 2019 chu an pawm a; Policy tharah hian thil chi hrang hrang ziah luh a ni. Cabinet meeting chuan GAD aṭanga lut, SEDP hnuaia board 14-a vice chairman-te kalphung tur chungchanga ruahmanna, 'Terms of Reference of SEDP Boards' tih chu an pawm. SEDP hnuaia board 14 vice chairman zingah hian 10 chu MLA an ni a, pali chu MLA hlui an ni. Vice chairman-te pisa, Secretariat Annex-I-a mi chu November 1, 2019 khan chief minister Zoramthanga'n a lo hawng tawh a ni.
Sorkar lirtheite enkawl dan tur ruahmanna thar, The Government of Mizoram Vehicle Outsourcing Policy, 2019 te, dan loa khaw dina sorkar aṭanga hmasawnna hna thawh khapna tur 'Prohibition of Development Activities in Unauthorised Settlement' te, Mizoram sorkar hnuaia e-procurement hman lai mek siamṭhat rawtna (sorkar thil tur cheng nuai 20 leh a chunglam man leina reng reng e-procurement-a kalpui) te, Chite lui humhalhna tur dan 'The Chite Lui (Prevention and Control of Water Pollution) Rules, 2019' te, AMC dan siamṭhatna 'The Mizoram Municipalities (Amendment) Bill, 2019' te an pawm bawk.