NK Chakma-a'n thuphá a cháwi

MLA hlui Nihar Kanti Chakma chuan September 19, Inrinni khan Aizawl Press Club-ah thuthar thehdarhtute a kâwm a; All India Chakma Student Union-in thuchhuah an siam chu a hriatpui loh thu sawiin, Tlabung chungchanga a thu tihdarh chung-changah thuphá a cháwi.

Congress party aṭanga MLA ṭhin NK Chakma chuan, artificial intelligence (AI) hmanga thu a ziahnaah Tlabung chu Chakma khaw hlun (homeland) leh kum 1898-a British rorelna hnuaia rìn luh a nih hmaa Chittagong Hill Tract-a bet leh Chakmate luah chin ram nia a ziah chu a tih sual a nih thu a sawi a ni.

Thil pawi tak a ziak sual tih sawiin NK Chakma chuan, "Tlabung YMA chungah thupha ka chawi tawh a. Boruak a dài tawh dawn emaw kan tih laiin, All India Chakma Student Union-te'n thuchhuah an lo siam leh a, an thuchhuah hi ka hriatpui lo," a ti.

Nihar Kanti Chakma chuan, AICSU thuchhuah leh a kaihhnawiha thil thlengte chu pawi a tih thu sawiin "Heng zawng zawng lo thlenna chu keimah vang a ni tih ka pha lo," a ti a; thupha a chawina chu pawmsak turin mipui a ngen a ni.