KHAWTHLIR

YMCA President

Mizoram minister of state Lalnghinglova Hmar chu Young Men's Christian Association (YMCA), Aizawl president thar a ni. YMCA Aizawl president kalchhuak Dr R Lalthangliana, MLA chuan September 18, 2026 khan president thar Lalnghinglova Hmar hnenah mawhphurhna a hlan.

Meth man

Assam Rifles leh Saitual Police ṭang dun chuan September 18, 2026 khan Mimbung-Kawlbem-Ngopa pengṭhuamah mi pakhat hnen aṭangin methaphetamine kg 2.285-a rit an man. Ngopa Police Station-ah NDPS Act tlawhchhanin thubuai ziah luh a ni.

Léngkìrah tla hlum

September 19, 2026 Zirtawpni zan dar 7 vel khan chakai meichher chhit tura kal A Zairemmawia (42) s/o A Dengṭhuama (L), Lawngtlai College Veng chu léngkìrah a tla hlum. Thu dawn danin, A Zairemmawia hi a ṭhiante nen Mampui ramah chakai khawrh turin an kal a, chakai chaw tur an chiah zo, zanriah an ei hnuah chawi an eina bul léngkìrah a tla a ni. Nimin zing khan a ruang lak chhuak a ni a, nimin vêk khan vui a ni.

PUC EU jubilee

Pachhunga University College-a Evangelical Union (EU) chuan September 19, 2026 Zirtawpni khan PUC seminar hall-ah an kum 50-na, golden jubilee an lawm a, EU hruaitu lo ni tawh ṭhinte'n an hmanpui. PUC-a EU hruaitu lo ni tawh ṭhin, jubilee lawmna hmanpuitu zingah hian Home minister K Sapdanga leh Synod moderator hlui Rev. R Lalhmingthanga te pawh an tel a ni.

Industry hmasawnna tur an rel

Mizoram Industry Owners Association member-te chu September 19, Inrinni khan Aijal Club-ah an inhmukhawm a; Mizorama industrial estate mumal zawk leh hmasawnna tur hrang hrang sorkarah thlen an rel. MIOA chuan, sorkarin thu a chhuah tawh angin, industry atana ruahman ram chhunga dan loa awmte lakah tun aia chak zawkin sorkarin hma la se, Industial Policy pahnih awm tawh chu Act-ah dah ni se, hemi kawngah hian chak taka sorkar nawr ni se, an ti.