India ram hmasawnnaah engineer-te'n hmun pawimawh tak an chang - Larsap

Larsap Gen. Vijay Kumar Singh chu September 19, Inrinni khan The Institution of Engineers (India)-in 'Engineering India's Global Footprint: Technology, Talent & Trust' tih hmanga SCOPE Convention Centre, New Delhi-a Education Excellence Summit & Award an buatsaihah khuallian a ni a; India ram hmasawnnaah engineer-te'n hmun pawimawh tak an chan thu a sawi.

Gen. VK Singh chuan, India ram hmasawnna rahbi zawhah engineer-te an pawimawh thu sawiin, "Thiamna sang zelah ram hrang hrangte chu thil deh chhuah hralhna mai ni lo, thiamna neih leh mar páta ṭan lak kawngah an inel mek. India ramin thiamna leh theihna tam tak a neihte ṭangkai taka chhawr thiam a ṭul," a ti a; engineering hmanga hnathawhte chu ṭha, tlo leh rintlak tia hriat a nih theih nan theihtawp chhuah turin engineer-te a chah.

Engineer tam tak chher chhuah ringawt a tâwk lo tih sawiin Larsap chuan, "Engineer rawn chhuak zel turte chuan thiamna nghet tak an neihte zau zawka ngaihtuahna sênga an chhawr thiam a ṭul a, degree an dawn zatah ni loin, an ngaihtuah chhuah theihah kan teh zawk tur a ni. India ram thiamna leh theihna te ram dangte'n an rin ngam theih nan kan thil deh chhuahte a ṭha tawk em, tehkhâwng a pha em tih thlenga kan ngaih pawimawh a ṭul," a ti.

Governor chuan, India hmarchhak state-te chu hmun chhengchhia, ram leilung venthâwn ngai leh India rama hmun pawimawh tak an nih thu sawiin, "Engineering hna thawh kawngah harsatnate awm bawk mah se, hmasawnna thil thar leh danglam bik thlenna hmun remchang tak a ni," a ti a; hmarchhak ram chhengchhe tak chu engineer tan chona leh a taka thiamnate lantirna remchang a nih thu a sawi.

Mizoramah hmasawnna ruhrel din turin tlang ram chhengchhia leh sik leh sa laka him bakah, tunlai thiamnate hman a ṭul tih sawiin Larsap chuan, "India ram hma lam thui tak chu engineer-te kutah a innghat tlat a ni," a ti a; ram changkang Viksit Bharat @2047 thlen theih nan theihtawp chhuah turin engineer-te a chah.

Summit-ah hian industry hotu, policy siamtu, zirmi leh engineer-te an tel a, khawvela engineering leh technology lama India ram hmasawnna leh pawimawhna te sawiho a ni.