TB donaa thawhho dan tur sawiho

September 18, 2026 khan Health & Family Welfare minister Lalrinpuii hoin a pisaah HFW department, LAD leh Roral Development department hotute leh All Mizoram Village council Association office bearer-te'n ngawr (tuberculosis - TB) ûmbona atana thawhho dan tur an sawiho.

Ṭhutkhawmah hian state TB officer Dr Zochhuanawmi'n TB programme performance report tarlangin, VC-te nena thawhho dan tur ruahmannate a sawifiah a; thawhhona tura ruahmannate chu sawiho a ni.

Minister Lalrinpuii chuan, TB Free Mizoram neih turin khaw tinte TB lakah an fihlim hmasak a ṭul thu a sawi a, "TB vei a tam thei ang ber hmuh chhuah a, chumi rual chuan inkai lo tura TB venna, TB preventive therapy a tam thei ang ber pekte chu tihmakmawh a ni," a ti.

Health Minister chuan, TB vei awlsam zuala ngaih - zunthlum nei, mei zu ṭhin leh zu in mi te, upate leh chaw ṭha ei tur nei mumal lote a tam thei ang ber endik a pawimawh thu a sawi a; TB Free Mizoram ni tura hmalaknaah VC-te'n theihtawp an chhuah chu a kawng hmasa a nih thu sawiin, an khua ṭheuhah theihtawp chhuah turin VC-te a ngen a ni.