SIR-a lungawi lote tan hearing nei dawn hnai

Electoral roll Special Intensive Revision (SIR), 2026 final electoral roll tihchhuah taka Aizawl district-a electoral registration officer (ERO)-te thutluknaa lungawi lo, District Magistrate hnena appeal thehlutte tan September 23-30, 2026 chhungin Aizawl DC pisaah appeal hearing neih a ni dawn.

September 7, 2026 khan SIR 2026 final electoral roll tlangzarh a ni a, electoral roll tharah hian voter 8,35,869 awmin, mipa 4,03,179, hmeichhia 4,32,689 leh transgender pakhat an ni. SIR 2026 neih a nih hmain Mizoram electoral roll-ah voter 8,75,068 an awm a, roll hman lai aiin SIR roll tharah voter 39,199 (4.48%)-in an tlem zawk.

SIR 2026 final electoral roll tlangzarh tawh ni mah se, Electors Rules, 1960 Rule 27 leh Representation of the People Act, 1950 Section 24(a) hnuaiah ERO thutluknaa lungawi lote tan final roll tihchhuah aṭanga ni 15 ral hmain district magistrate hnenah zualko theih a ni.

Aizawl district-a MLA bial 11 aṭangin District Magistrate hnenah appeal eng emaw zat a lut a; September 23-30, 2026 chhungin DC pisaah hearing neih tur niin, appeal thehluttute chu hearing-ah lehkha pawimawh hrang hrang original kengin kal ngei tur a ni.

Hearing neih dan tur chu - September 23-ah Aizawl North-I, North-II leh East-I biala mite tan; September 24-ah Aizawl South-I , West-I leh West-III tan; September 25-ah Aizawl West-II, South-II leh South-III tan; September 28-ah Aizawl North-III tan, September 29-30-ah Aizawl East-II biala mite tan a ni ang.