Social media-a an thil hmuhte âwih nghal lo turin MLA-in zirlaite a chah

Mizo Higher Secondary School chuan September 18, 2026 Zirtawpni khan Annual Sports khârna hun Mizo High Sikul Field-ah an hmang a, MLA T Lalhlimpuia'n hmanpuiin, social media-a an thil hmuh reng reng awih nghal lo tur leh a dik leh dik loh hriat tum turin zirlaite a chah.

T Lalhlimpuia chuan, tunlaia khawvela indona leh inbeihna chanchin te, tun hnaia Mualṭhuam North High School zirlai thih dan te chu a rapthlak thu a sawi a, "A rapthlak ber chu Facebook, Instagram comment section-ah a awm. Thil reng reng i hmuh apiang kha awih nghal suh a, a source zawng rawh. Tunlaiah mi fing ber chu thu dik leh dâwt thliar hrang thiam a ni," a ti.

Artificial intelligence (AI) hman thiam a pawimawh thu sawiin Lalhlimpuia chuan, "Engkim hi a AI deuh vek dawn. Hlauh suh u, AI hian in hna a chhuh dawn lo, mahse, AI hmang thiam chuan AI hmang thiam lo chu a chhuhsak ngei ang," a ti a; AI chu thil lâk chhâwn (copy)-na atan hmang loin, inzirna atan hmang turin a chah.

Lunglei West bialtu MLA chuan, Mizoram chu India ram state zinga HIV/AIDS hluarna ber state a nih thu sawiin, HIV laka an fihlim theih nan inveng fimkhur turin zirlaite a chah a; kum 16-19 inkar chu hun ṭha ber lai a nih rualin, a hlauhawm ber lai a nih thu a sawi a, "Phone kha hmang rawh, phone khan hmang che suh se," a ti.